Tirana International Airport ka shënuar një rritje historike të fitimeve, duke arritur në 44.37 milionë euro para taksave në vitin 2024, sipas të dhënave financiare të raportuara nga grupi Kastrati.
Ky është niveli më i lartë i fitimeve që nga marrja në administrim e aeroportit dhe vjen si rezultat i rritjes së fortë të trafikut ajror gjatë periudhës 2022–2024.
Të ardhurat e aeroportit janë rritur nga 83 milionë euro në 2022, në 100.9 milionë euro në 2023 dhe në 114 milionë euro në 2024.
Rritja lidhet drejtpërdrejt me zgjerimin e numrit të fluturimeve, shtimin e destinacioneve dhe rritjen e pandalshme të numrit të pasagjerëve, ku Tirana është bërë një nga aeroportet me ritmin më të shpejtë të rritjes në Europë.
Paralelisht me performancën financiare, në aeroport janë realizuar investime madhore që kanë shtuar kapacitetin operativ.
Pista është zgjatur për të pritur avionë më të mëdhenj të fluturimeve transoqeanike, ndërsa terminali dhe hapësirat e shërbimeve janë modernizuar, duke përmirësuar ndjeshëm fluksin dhe cilësinë e operimit.
Rritja e fitimeve dhe kapacitetit të aeroportit pritet të krijojë hapësirë për zhvillime të mëtejshme, ndërsa Tirana konsolidon rolin e saj si një nyje kryesore ajrore në rajon. /skyweb.al
