Vijon kaosi me sistemin e fiskalizimit pavarësisht njoftimeve të Tatimeve se gjithçka u rregullua disa ditë më parë.
Burime bëjnë me dije për skyweb.al se gjatë ditës së sotme shumë biznese kanë hasur sërish vështirësi në lëshimin e faturave, për shkak të mosfunksionimit të sistemit të fiskalizimit të administruar nga Administrata Tatimore.
Problematika rikthehet vetëm pak ditë pasi Tatimet njoftuan zyrtarisht se sistemi ishte rikthyer në funksion normal, pas rreth dhjetë ditësh ndërprerje dhe bllokimesh që paralizuan aktivitetin e mijëra subjekteve. Në terren, realiteti duket ndryshe, pasi bizneset raportojnë se sistemi po shfaq sërish ndërprerje dhe pamundësi për faturim në kohë reale.
Problemet lidhen me rolin e Tatimeve, AKSHI-t dhe cilësinë e shërbimeve të ofruara nga kompanitë e kontraktuara, përmes procedurave që janë vënë më herët nën lupën e SPAK.
Hetimet e SPAK për praktika korruptive në sektorin e teknologjisë dhe prokurimeve publike kanë ushqyer perceptimin se problemet teknike nuk janë thjesht çështje infrastrukture, por edhe pasojë e vendimmarrjeve korruptive. /skyweb.al
