Shqipëria pritet të ndryshojë mënyrën si trajton investimet e huaja dhe koncesionet, pasi partneritetet publike–private dhe marrëveshjet strategjike do të kalojnë në një mekanizëm të ri shqyrtimi me asistencë amerikane. Qëllimi është të garantohet transparencë, shmangia e abuzimeve dhe mbrojtja e sektorëve kritikë nga aktorë të dëmshëm ekonomikë.
Në një përgjigje për Top Channel, Ambasada Amerikane sqaroi se mekanizmi i shqyrtimit të investimeve është një instrument ligjor që u lejon qeverive të kontrollojnë investimet e huaja për të vlerësuar rreziqet ndaj sigurisë kombëtare.
Sipas deklaratës zyrtare, një mjet i tillë “do të mbronte sektorët kritikë të Shqipërisë nga aktorë keqdashës dhe do të mbështeste një mjedis investimesh të hapur dhe transparent, të drejtë dhe të parashikueshëm për kompanitë amerikane dhe të tjera.”
Ky zhvillim u bë publik pas takimit mes të Ngarkuarës me Punë të SHBA, Nancy Vanhorn, dhe ministres së Ekonomisë dhe Inovacionit, Delina Ibrahimaj, ku u diskutua nevoja për një filtër të ri mbi koncesionet, si dhe përfshirja e ekspertizës amerikane në proceset e vlerësimit.
I pyetur nga media për mënyrën si do të funksionojë mekanizmi dhe për kë synon, një zyrtar i Ambasadës theksoi se Shtetet e Bashkuara duan të forcojnë bashkëpunimin ekonomik me Shqipërinë duke mbështetur partneritete të drejta dhe të sigurta, veçanërisht për bizneset amerikane.
“Shtetet e Bashkuara janë të përkushtuara për të mbështetur prosperitetin ekonomik dhe partneritete të drejta për amerikanët, përfshirë bizneset amerikane në Shqipëri, si dhe për të forcuar sigurinë e teknologjive kritike”, deklaroi zyrtari.
SHBA dhe Shqipëria shkëmbejnë rregullisht ekspertizë në çështje me interes të përbashkët, por ky mekanizëm pritet të vendosë për herë të parë një filtër të dedikuar që monitoron investimet e huaja, duke synuar uljen e riskut në sektorët strategjikë dhe rritjen e besimit tek investitorët seriozë.
