Gjatë vizitës së tij zyrtare në Katar, kryeministri Edi Rama zhvilloi një takim me Drejtorin e Përgjithshëm të Qatar Airways, Ing. Badr Mohammed Al-Meer. Rama bëri të ditur se bisedimet përfshinë edhe mundësinë që kompania ajrore prestigjioze të nisë operimet në Shqipëri. “Ishallah do të kemi së shpejti fluturimet e Qatar Airways për Tiranë”, u shpreh ai në rrjetet sociale.
Në këtë takim, kryeministri ishte i shoqëruar nga ministri për Pushtetin Vendor, Ervin Demo.
Ndërkohë, të dielën, Rama u takua edhe me kryeministrin e Katarit, Mohammad bin Abdulrahman bin Jassim Al Thani, i cili mban njëkohësisht detyrën e ministrit të jashtëm. Sipas Ramës, bisedimet u përqendruan në forcimin e marrëdhënieve dypalëshe dhe avancimin e disa projekteve të rëndësishme për Shqipërinë. /Skyweb.al
