Dy ditë më parë, Skyweb.al raportoi se në portalin zyrtar të punësimit, puna.gov.al, ishin të listuara rreth 6 mijë vende të lira pune për qytetarët. Por të dhënat tregojnë se pjesa dërrmuese e këtyre pozicioneve vijojnë të jenë për profesione që nuk kërkojnë arsim të lartë.
Sipas analizës së Monitor, gjatë vitit të kaluar gati 80 për qind e vendeve të lira të shpallura nga Agjencia Kombëtare e Punësimit ishin për punë që kërkojnë vetëm arsim elementar. Në periudhën janar–dhjetor 2024 u raportuan 61,624 vende të lira, me një rritje prej 1 për qind ndaj një viti më parë, por struktura e profesioneve mbetet e pandryshuar: të pakualifikuarat dominojnë.
Të dhënat e detajuara tregojnë se:
• Profesione elementare përbëjnë 27.2% të vendeve të shpallura.
• Punonjësit e shitjeve dhe shërbimeve zënë 18.9%.
• Industria për 11.7%.
• Zejtarët për 23%.
Këto katër kategori përfaqësojnë pothuajse 80% të totalit të vendeve të lira të punës në Shqipëri, duke reflektuar një treg që kërkon kryesisht punë manuale ose me aftësi minimale profesionale. Profesionet më të kërkuara gjatë vitit 2024 rezultuan punëtorë prodhimi, magazinierë, pastrues, shitës, kamarierë, operatorë shërbimi, punëtorë ndërtimi dhe pozicione bazike në industrinë përpunuese.
Sektori që shpalli më shumë vende të lira ishte industria përpunuese me 28.6%, ndjekur nga akomodimi dhe shërbimi ushqimor me 17.8%, tregtia me shumicë e pakicë dhe shërbimet e tjera me 28%, ndërsa ndërtimi zuri 9.4% të vendeve të shpallura.
Krahasuar me një vit më parë, ka një rënie prej rreth 5% të pozicioneve të shpallura nga industria përpunuese dhe një rritje prej 4% në sektorin e akomodimit dhe shërbimit ushqimor, duke sinjalizuar zhvendosjen e tregut të punës nga prodhimi drejt shërbimeve.
Megjithatë, struktura e tregut mbetet e përqendruar te profesione me produktivitet të ulët, ndërsa pozicionet që kërkojnë arsim të lartë, specializim apo aftësi teknike zënë një pjesë shumë të vogël të totalit. Të dhënat ndërkombëtare tregojnë se Shqipëria ka krijuar shumë më pak punësim për punonjës të kualifikuar sesa vendet e tjera të Europës Juglindore në dy dekadat e fundit.
Punësimi rritet çdo vit, por përfituesit kryesorë mbeten profesionet elementare, ndërsa personat me arsim të lartë përballen me një treg që nuk ofron pozicione të mjaftueshme të kualifikuara.
