Kryeministri Edi Rama ka njoftuar se qeveria po përgatit një marrëveshje të re me Katarin, që përfshin edhe futjen e partneriteteve publik–private në shërbimin spitalor. Deklarata u bë gjatë podcastit “Flasim”, ku Rama foli për vizitën e tij disa ditore në Doha.
Ai tha se ka zhvilluar bisedime të gjata me Kryeministrin e Katarit, Sheikun Muhamed bin Abdulrahman bin Jassim Al Thani, i cili pritet të vijë në Shqipëri në muajt e parë të vitit të ardhshëm. Sipas Ramës, gjatë vizitës do të prezantohet një agjendë e re bashkëpunimi mes dy vendeve.
Në këtë kuadër, Rama konfirmoi se po përgatitet hyrja në Shqipëri e një strukture spitalore nga Katari, e cila do të operojë si shërbim privat dhe potencialisht si model PPP në sistemin publik. Ai theksoi se marrëveshja synon të shtrihet drejtpërdrejt në sektorin spitalor dhe të ndikojë në organizimin e shërbimeve publike.
Detajet e marrëveshjes pritet të bëhen publike gjatë vizitës së kryeministrit të Katarit në Tiranë. /skyweb.al
