Të dhënat e fundit të INSTAT për aksidentet rrugore gjatë muajit korrik 2025 zbulojnë se dita më e rrezikshme për të udhëtuar është e marta, ku ndodhin gati 20% e aksidenteve të muajit, ndërsa dita më e sigurt është e premtja, me vetëm 9.2% të tyre.
Po ashtu, ora 08:00–12:00 rezulton periudha më problematike, pasi përqendron mbi një të katërtën e aksidenteve (28.2%).
Gjatë periudhës janar–korrik 2025, aksidentet rrugore kanë pësuar një rënie me 16% krahasuar me të njëjtën periudhë të vitit 2024, duke treguar një tendencë pozitive në uljen e ngjarjeve. Edhe në vetë muajin korrik 2025 janë regjistruar 131 aksidente, nga 146 një vit më parë, pra një ulje me 10.3%.
Megjithatë, pavarësisht këtij zhvillimi, është rritur numri i personave të prekur nga aksidentet. Në korrik 2025 janë regjistruar 136 persona të aksidentuar, nga 123 në korrik 2024, duke shënuar një rritje prej mbi 10%. /skyweb.al
