Tërheqja e bonusit të fundvitit për pensionistët ka nisur me ritme të larta në të gjithë vendin. Ministrja e Ekonomisë dhe Inovacionit, Delina Ibrahimaj, bëri të ditur se vetëm në dy ditët e para janë tërhequr 42,631 bonuse nga pensionistët.
Sipas saj, procesi po vijon normalisht dhe bonuset në masën 10,000 deri në 15,000 lekë po përfitohen nga qytetarët në të gjitha pikat e shpërndarjes.
“Pensionistët në të gjithë vendin vijojnë të tërheqin bonuset e fundvitit në masën 10,000 – 15,000 lekë. Vetëm në dy ditët e para janë tërhequr 42,631 bonuse. Bonusi i fundvitit është një mbështetje e qeverisë për mbi 762 mijë përfitues në të gjithë vendin”, shkruan Ibrahimaj.
Nga shpërblimi pritet të përfitojnë gjithsej 762,740 persona, ku 640,325 janë pensionistë pleqërie, 2,322 përfitojnë pension social, 65,232 marrin pension invaliditeti, 48,087 janë përfitues të pensionit familjar, ndërsa 6,774 persona përfitojnë trajtim të veçantë financiar si minatorë të nëntokës, punonjës të ish-ndërmarrjeve ushtarake apo ushtarakë në pension të parakohshëm.
Shpërblimi do të vazhdojë të paguhet gjatë gjithë muajit dhjetor 2025 dhe mund të tërhiqet deri më 30 qershor 2026 për ata që nuk arrijnë ta marrin brenda afatit të parë. /skyweb.al
