Skena e “sober raving” po rritet me shpejtësi në Londër dhe në mbarë botën. Në klubet Fire dhe Lightbox në Vauxhall, organizata House of Happiness zhvillon festa ditore pa alkool dhe pa drogë, duke ofruar një eksperiencë të plotë për njerëzit që duan të argëtohen pa konsumuar substanca. Themeluar në vitin 2022, eventi tërheq kryesisht njerëz nga fundi i të 20-ave deri në mesin e të 40-ave, por ka pasur edhe pjesëmarrës deri në 80 vjeç, shkruan CNN.
Bashkëthemeluesi Neil Hudson-Basing, i cili hoqi dorë nga droga dhe alkooli gjashtë vite më parë, thotë se qëllimi i tyre ishte të krijonin një hapësirë të gjallë dhe energjike, me të gjitha elementet e një nate të zakonshme në klub , por pa substanca. Ai e sheh këtë si alternativë ndaj kulturës britanike të mbingarkuar me konsum alkooli.
Trendi është global: në Singapor po bëhen të njohura “matcha raves,” në SHBA është rritur “soft clubbing,” dhe Eventbrite raporton rritje prej 92% të eventeve “sober-curious” në vitin 2024. Në Evropë, festa të ngjashme mbahen në Berlin dhe Paris, dhe Ministry of Sound ka nisur seri të dedikuara sober.
Morning Gloryville, një pionier i skenës që nga 2013, kombinon muzikën elektronike me aktivitete mirëqenieje si yoga e meditimi. Qëllimi i tyre është të krijojnë një mjedis pozitiv dhe të sigurt, larg rreziqeve që lidhen me konsum substancash në klubet tradicionale.
Fenomeni është përhapur edhe në SHBA me Daybreaker, e cila organizon festa të mëngjesit pa alkool në qytete si Nju Jorku, Tokio, Buenos Aires e shumë të tjera. Themeluesja Radha Agrawal thekson rëndësinë e lidhjes sociale dhe ndikimin e alkoolit në rritjen e ndjenjës së vetmisë.
Megjithëse përdorimi i drogës nuk ka rënë ndjeshëm, konsumimi i alkoolit është në rënie, sidomos mes të rinjve në vendet me të ardhura të larta. Megjithatë, shumë njerëz thonë se klubet tradicionale janë të vështira për t’u përjetuar pa pirë, ndaj eventet sober u ofrojnë një hapësirë më të rehatshme dhe mbështetëse.
Në House of Happiness, pjesëmarrësit thonë se këto festa i lejojnë të lidhen me të tjerët, të ndihen më të lirë dhe të shijojnë muzikën pa presionin e konsumimit të substancave — edhe pse jo të gjithë janë plotësisht të përmbajtur nga alkooli në jetën e tyre të përditshme. /Skyweb.al
