Në një seancë të fundit të Komitetit për Punë të Jashtme të Dhomës së Përfaqësuesve, administrata e presidentit Donald Trump u thirr të shtojë angazhimin ndaj Ballkanit Perëndimor. Kryetari i Nënkomisionit për Evropën, Keith Self, paralajmëroi se rajoni po përballet me rritje të paqëndrueshmërisë, veçanërisht pas pushtimit rus të Ukrainës.
Ai e përmendi Serbinë si një faktor të rëndësishëm destabilizues dhe theksoi se tensionet e vazhdueshme mes Kosovës dhe Serbisë mbeten burimi kryesor i krizës. Self foli edhe për aktivitetet hibride të Rusisë dhe Kinës, të cilat po përpiqen të shfrytëzojnë situatën për të rritur ndikimin e tyre në rajon.
Ai theksoi se Kina po përdor marrëdhëniet ekonomike dhe bashkëpunimin ushtarak me Serbinë për të forcuar praninë e saj, duke përfituar nga niveli i lartë i korrupsionit në Ballkan.
Sipas Self, Ballkani Perëndimor është shpesh i lënë pas dore nga politika perëndimore, ndonëse mbetet një zonë me potencial të madh për stabilitet dhe zhvillim përmes një angazhimi më të fortë amerikan.
Eksperti i menaxhimit të konflikteve, Edward P. Joseph, theksoi se edhe pse nuk ka një aktor të vetëm përgjegjës për tensionet, stabiliteti i rajonit varet kryesisht nga gatishmëria e Serbisë për të pranuar rendin perëndimor.
Ai bëri thirrje që SHBA-ja të vendosë udhëzime më të qarta për Beogradin dhe nënvizoi se orientimi euroatlantik është e vetmja rrugë reale për Serbinë.
Joseph propozoi që një zgjidhje afatgjatë e krizës të parashikojë anëtarësimin në NATO si për Kosovën, ashtu edhe për Serbinë, duke sugjeruar se presidenti Trump mund të ketë rol në ofrimin e një propozimi transformues.
Ai kritikoi qasjen e pabalancuar të SHBA-së ndaj Beogradit dhe Prishtinës, duke thënë se përgjegjësia për provokimet i është adresuar kryesisht vetëm Prishtinës.
