Administrata tatimore ka vijuar trendin pozitiv të mbledhjes së të ardhurave, duke reflektuar rritjen e pagave dhe zgjerimin e aktivitetit ekonomik. Të dhënat zyrtare tregojnë se gjatë muajit nëntor të ardhurat tatimore arritën në 36 miliardë lekë, rreth 360 milionë euro, një rritje prej 12.3% krahasuar me të njëjtin muaj të vitit të kaluar.
Kjo rritje përkthehet në rreth 4 miliardë lekë më shumë se nëntori i vitit 2024, ndërsa në raport me planin mujor u kapërcye parashikimi me 590 milionë lekë, ose 1.7% më shumë. Performanca pozitive vijon pavarësisht largimit të efekteve të sezonit turistik, duke treguar konsum të lartë dhe aktivitet të qëndrueshëm ekonomik, me TVSH-në e brendshme si kontribuuesin kryesor.
Në totalin e 11 muajve, administrata tatimore ka mbledhur 250 miliardë lekë, me 43 miliardë lekë më shumë se periudha janar–nëntor 2024.
Rritja e të ardhurave tatimore mbështetet kryesisht te Tatimi mbi Vlerën e Shtuar, tatimi mbi fitimin dhe tatimi mbi të ardhurat personale. Pikërisht tek ky i fundit vërehet ndikimi më i madh i rritjes së pagave, si në sektorin publik, ashtu edhe në atë privat. Efektet e reformës kundër informalitetit dhe deklarimi më i rregullt i punësimit kanë shtuar të ardhurat nga pagat.
Kontribut kanë dhënë edhe fushata për faturimin elektronik dhe kontrollet në terren, të cilat po rrisin nivelin e formalizimit. Gjithashtu, pagesat e rregullta të detyrimit të DIVA-s nga të punësuarit kanë ndikuar në këtë performancë. /skyweb.al
