Ka agravuar në dhunë dhe tensione të mëdha protesta e fermerëve në Greqi këtë të martë. Sipas mediave vendase, situata degradoi në përplasje me policinë dhe në mbylljen e përkohshme të aeroportet e Haniasë dhe Iraklios në ishullin e Kretës.
Fermerët, të pajisur me traktorë dhe automjete, marshuan drejt aeroporteve. Forcat policore ngritën barriera për t’ua ndalur rrugën.
Kur protestuesit tentuan të thyejnë kordonin, policia reagoi me gaz lotsjellës, gjë që çoi në tension të madh dhe përleshje fizike.
Sipas raportimeve, disa policë u plagosën gjatë përplasjeve. Aeroportet u hapën pas disa orësh përleshje, ndërsa feremerët thanë se do t’i mbyllin sërish të martën në mëngjes.
Protesta e sotme është pjesë e një lëvizjeje të gjerë që prej fund-nëntorit ka përfshirë gjithë Greqinë. Fermerët kërkojnë përshpejtimin e subvencioneve të BE-së dhe uljen e kostove të prodhimit, në mes të akuzave për shpërndarje të padrejtë të ndihmave financiare vetëm për individë të lidhur me pushtetin.
Në veri të Greqisë, bllokadat vazhdojnë në doganën e Promahonas me Bullgarinë, në autostradën Egnatia pranë Kozanit, si edhe në Kardhicë e Thesali, ku qindra traktorë mbajnë të paralizuara rrugë strategjike. Në disa zona protestat janë simbolike, ndërsa në të tjera situata ka degjeneruar në përplasje të drejtpërdrejta me policinë.
Kryeministri Kyriakos Mitsotakis u ka bërë thirrje fermerëve të ulin tonet, duke premtuar se pagesat e subvencioneve dhe masat mbështetëse do të kryhen brenda dhjetorit. Por protestuesit paralajmërojnë se do të ashpërsojnë aksionet nëse kërkesat e tyre nuk plotësohen menjëherë. /Skyweb.al
