Shqiptarët rezultojnë populli më i kënaqur me ekonominë në Ballkanin Perëndimor, por në të njëjtën kohë mbeten ndër më të pasigurtit financiarisht dhe më të pakënaqurit me nivelin e pensioneve. Të dhënat vijnë nga raporti i fundit i Këshillit të Bashkëpunimit Rajonal (RCC), që mat perceptimet ekonomike të qytetarëve në rajon gjatë vitit 2025.
Sipas raportit, 31 për qind e shqiptarëve deklarojnë se janë shumë të kënaqur me gjendjen ekonomike, niveli më i lartë në rajon, i ndjekur nga Kosova me 29 për qind. Serbia dhe Bosnja raportojnë kënaqësinë më të ulët. Në raport me vitin 2022, pakënaqësia ka rënë ndjeshëm, nga 58 për qind në 44.7 për qind.
Megjithatë, të dhënat tregojnë se krahas kësaj kënaqësie të deklaruar, presioni mbi familjet shqiptare mbetet i lartë. Në mbarë Ballkanin Perëndimor, shqetësimi kryesor lidhet me koston e jetesës, inflacionin dhe pagat. Por në Shqipëri, problemi më i madh i raportuar janë pensionet, një sinjal i qartë i pasigurisë që përjetojnë të moshuarit dhe familjet me të ardhura të ulëta.
Raporti evidenton se vendi regjistron nivelin më të lartë të pasigurisë financiare në rajon: 54.5 për qind e shqiptarëve thonë se nuk mund të mbulojnë një shpenzim të papritur prej rreth 1000 eurosh pa marrë borxh ose pa kërkuar ndihmë. Ky tregues shënon rritje nga një vit më parë, duke kaluar nga 53.3 për qind në vitin 2024. Edhe në Maqedoninë e Veriut gjysma e popullsisë përballet me të njëjtin problem.
Të dhënat zbulojnë gjithashtu se 40.5 për qind e shqiptarëve nuk mund të shpenzojnë para për veten çdo javë, niveli më i lartë në rajon. Po ashtu, Shqipëria ka edhe numrin më të madh të personave që thonë se nuk kanë mundësi të dalin çdo muaj me miq ose familjarë, një tregues që lidhet drejtpërdrejt me presionin mbi buxhetet familjare.
Rezultatet nënvizojnë kontrastin e fortë mes perceptimit të përgjithshëm pozitiv për ekonominë dhe vështirësive reale të përditshme, veçanërisht për kategoritë vulnerabël dhe pensionistët, tek të cilët pasiguria financiare vijon të mbetet e lartë. /skyweb.al
