Facebook po teston vendosjen e një kufiri për numrin e linqeve që disa përdorues mund të shpërndajnë në postimet e tyre në platformë, raporton BBC.
Sipas njoftimeve që kanë marrë disa përdorues në Mbretërinë e Bashkuar dhe në SHBA, ata mund të ndajnë vetëm një numër të caktuar linkesh në postimet në Facebook, përveç rasteve kur paguajnë një abonim, i cili nis nga 9.99 paund në muaj.
Meta e ka përshkruar këtë si “një test të kufizuar për të kuptuar nëse mundësia për të publikuar një volum më të madh postimesh me linke sjell vlerë shtesë” për abonentët.
Eksperti i rrjeteve sociale Matt Navarra tha se kjo tregon përpjekjen e kompanisë për të monetizuar edhe më shumë funksione të platformave të saj. “Kjo nuk ka të bëjë aq shumë me verifikimin, sa me vendosjen e funksioneve thelbësore pas një abonimi,” i tha ai BBC-së.
Meta Verified u ofron përdoruesve të Facebook dhe Instagram shenjën blu të verifikimit, mbështetje të përmirësuar për llogarinë dhe mbrojtje nga imitimi.
Sipas Navarrës, pasi Meta vendosi një çmim për këto veçori, tani duket se po bën të njëjtën gjë edhe me shpërndarjen e përmbajtjes dhe “aftësinë bazë për të dërguar njerëzit” drejt faqeve të tjera të internetit.
Ai ishte mes atyre që u njoftuan për këtë test, duke marrë një mesazh se nga 16 dhjetori do të mund të ndajë vetëm dy linke në muaj në postimet në Facebook.
“Nëse je krijues përmbajtjeje apo biznes, mesazhi është se nëse Facebook është pjesë e strategjisë tënde për rritje apo për gjenerim trafiku, atëherë kjo qasje tani ka një çmim,” tha Navarra për BBC-në.
“Sot kjo është më e drejtpërdrejtë se kurrë, edhe pse ky ka qenë drejtimi prej kohësh.”
Realitet i ashpër për krijuesit
Së bashku me platforma të tjera sociale si LinkedIn, Meta ka inkurajuar përdoruesit të verifikohen për të përfituar më shumë veçori apo angazhim në platformë.
Elon Musk ndryshoi skemën e verifikimit të Twitter-it pasi bleu platformën në vitin 2022, duke rezervuar shenjën blu të verifikimit për përdoruesit që paguajnë dhe duke u dhënë atyre më shumë dukshmëri në përgjigje dhe në faqen “For You”.
Ky ndryshim ka qenë i diskutueshëm dhe Bashkimi Europian e gjobiti platformën me 120 milionë euro në dhjetor.
Megjithatë, kompania e Mark Zuckerberg, Meta, prezantoi një skemë të ngjashme pak më vonë. Ajo njoftoi gjithashtu se do të ndjekë shembullin e X me një mjet “community notes”, ku përdoruesit mund të shënojnë postime mashtruese, pas shkurtimeve në moderim dhe verifikim faktesh.
Facebook i tha TechCrunch se testi për kufizimin e linkeve po zbatohet për një grup të vogël përdoruesish që përdorin “professional mode” ose Pages.
Këto funksione përdoren gjerësisht nga krijuesit dhe bizneset për të promovuar përmbajtje dhe për të analizuar performancën e saj tek përdoruesit.
“Sipas krijuesve, kjo përforcon një realitet mjaft të ashpër: Facebook nuk është më një burim i besueshëm trafiku dhe Meta po e largon gjithnjë e më shumë platformën nga ata që përpiqen ta përdorin për këtë qëllim,” tha Navarra.
Ai shtoi se kjo shërben edhe si kujtesë se “Meta gjithmonë do të optimizojë për Meta, para së gjithash”.
“Teste të tilla tregojnë pse ndërtimi i një biznesi që varet tepër nga vullneti i mirë i një platforme të vetme është jashtëzakonisht i rrezikshëm,” përfundoi ai /Skyweb.al
