Autoriteti Italian i Konkurrencës (AGCM) bëri të ditur sot se ka gjobitur kompaninë “Apple” me mbi 98,6 milionë euro për “abuzim me pozicionin dominues”.
Sipas AGCM-së, “Apple” ka shkelur ligjin e konkurrencës në tregun e zhvilluesve të aplikacioneve, siç theksohet në deklaratën zyrtare të autoritetit. AGCM nënvizoi se në këtë treg “Apple” gëzon një pozitë plotësisht dominuese përmes platformës së saj App Store.
Autoriteti italian shtoi se kompania ka vendosur kushte tepër kufizuese në lidhje me privatësinë e përdoruesve, të cilat ndikojnë negativisht në konkurrencën mes aplikacioneve. Sipas tij, këto kushte janë të njëanshme, dëmtojnë interesat e partnerëve të biznesit të “Apple” dhe nuk janë proporcionale me qëllimin e deklaruar të mbrojtjes së privatësisë.
Nga ana tjetër, “Apple” reagoi përmes një njoftimi për shtyp, duke deklaruar se nuk është dakord me vendimin e autoritetit italian të konkurrencës dhe se do ta apelojë atë. Kompania theksoi se rregullat e saj për mbrojtjen e privatësisë zbatohen në mënyrë të barabartë për të gjithë zhvilluesit, përfshirë vetë “Apple”, dhe se ato janë miratuar si nga përdoruesit, ashtu edhe nga autoritetet e mbrojtjes së të dhënave në mbarë botën. /skyweb.al
