Autoritetet turke kanë humbur kontaktin me radarin e një aeroplani tip Falcon që po transportonte pesë persona, mes tyre edhe Shefin e Shtabit të Ushtrisë Libiane, Gjeneral Mohammed Al-Haddad.
Aeroplani ishte nisur nga Ankaraja dhe kishte destinacion aeroportin e Tripolit. Lajmi u konfirmua nga ministri i Brendshëm i Turqisë, Ali Yerlikaya, përmes një postimi në rrjetin social X.
Sipas ministrit Yerlikaya, kontakti me aeroplanin u humb në orën 20:52 sipas kohës lokale. Ende nuk ka detaje zyrtare mbi shkaqet e humbjes së kontaktit apo mbi vendndodhjen e mjetit fluturues.
Autoritetet turke kanë nisur hetimet dhe operacionet përkatëse për të sqaruar rrethanat e ngjarjes, ndërsa priten informacione të reja në orët në vijim.
