Gjatë muajit nëntor, Aeroporti Ndërkombëtar i Tiranës (TIA) u përdor nga 765.890 pasagjerë. Sipas të dhënave zyrtare, gjatë këtij muaji u realizuan 4.490 fluturime drejt 67 destinacioneve në 21 shtete. Pesë destinacionet më të frekuentuara ishin Milano, Londra, Roma, Bolonja dhe Piza.
Në nëntor, në TIA operuan 20 linja ajrore, duke forcuar më tej rolin e aeroportit si një nga nyjet më të rëndësishme të udhëtimit në rajon. Aeroporti i Tiranës vijon të mbetet porta kryesore e udhëtimeve ajrore për shqiptarët dhe vizitorët që udhëtojnë drejt dhe nga Shqipëria.
Sipas INSTAT, gjatë muajit nëntor hynë në Shqipëri 1,282 milionë shtetas shqiptarë dhe të huaj, një rritje prej 1,4% krahasuar me të njëjtën periudhë të vitit të kaluar. Ndërkohë, nga vendi dolën 1,322 milionë persona, duke shënuar një rritje vjetore prej 3,7%. Pjesa dërrmuese e këtyre lëvizjeve u realizua përmes Aeroportit Ndërkombëtar të Tiranës.
Paralelisht, TIA po investon në digjitalizim dhe në përmirësimin e përvojës së udhëtarëve. Këto investime përfshijnë instalimin e portave elektronike për kontrolle kufitare më të shpejta, përdorimin e skanerëve të avancuar të sigurisë, zgjerimin e kapaciteteve të parkimit me mbi 1.900 vende dhe ndërtimin e një strukture shumëkatëshe, si edhe aplikimin e bordimit me karta digjitale që redukton pritjet në sportele. Këto masa kanë rritur ndjeshëm efikasitetin dhe kanë ofruar një përvojë më të thjeshtë dhe më të shpejtë për pasagjerët.
