Banka e Shqipërisë ka vendosur të kufizojë vlerën e kësteve të kredisë për qytetarët shqiptarë që duan të blejnë një banesë. Lajmin e bëri të ditur guvernatori i Bankës së Shqipërisë, Gent Sejko, gjatë një deklarate për shtyp, ku sqaroi se tashmë do të vendosen tavane të reja si për shumën e kredisë, ashtu edhe për raportin mes këstit të kredisë dhe të ardhurave të individëve.
“Në kuadër të masave të reja për kreditimin në tregun e pasurive të patundshme, vendosëm një kufi për huanë në raport me vlerën e banesës dhe për këstin në raport me të ardhurat e huamarrësit,” tha Sejko.
Sipas vendimit të Bankës së Shqipërisë:
- Për banesën e parë, kredia në lekë nuk duhet të kalojë 85% të vlerës së pasurisë, ndërsa për banesën e dytë 80%.
- Në rastet e kredive në valutë të huaj, huaja do të kufizohet në 75% të vlerës për banesën e parë dhe 70% për banesën e dytë, për të reduktuar rrezikun e kursit të këmbimit.
- Raporti i këstit me të ardhurat për kreditë në lekë do të jetë maksimumi 40% për banesën e parë dhe 35% për të dytën.
- Ndërsa për kreditë në valutë të huaj, ky raport do të jetë 35% për banesën e parë dhe 30% për banesën e dytë.
Sejko theksoi se këto masa synojnë të standardizojnë kushtet e kreditimit dhe të mbrojnë stabilitetin financiar.
Kjo ndërhyrje vjen në një kohë kur kredia për banesa ka shënuar rritje të vazhdueshme.
Sipas të dhënave të Bankës së Shqipërisë, në vitin 2024 kredia për banesa arriti në 54.9 miliardë lekë, duke u rritur me 13% krahasuar me vitin 2023.
Agjentët e pasurive të paluajtshme e lidhin këtë trend me normat e ulëta të interesit dhe rritjen e pagave, faktorë që kanë ndihmuar qytetarët të plotësojnë më lehtë kriteret bankare për marrjen e kredisë./skyweb.al
