Pas një dhjetori të pazakontë, thuajse pa reshje dhe me mungesë dëbore edhe në zonat e thella malore, muaji janar pritet të nisë me ndryshime të forta të kushteve atmosferike.
Sipas sinoptikanëve, ditët në vijim do të karakterizohen fillimisht nga temperatura shumë të ulëta dhe mot i kthjellët, si pasojë e depërtimit të një mase ajrore të ftohtë që vjen nga Poli i Veriut. Në Tiranë, temperaturat janë afruar sot pranë 0 gradëve, ndërsa gjatë natës pritet që në zonat malore ato të zbresin deri në -8 dhe -9 gradë Celsius. Në Korçë, temperaturat minimale do të shkojnë deri në -6 gradë.
Megjithatë, ky episod i acartë nuk do të zgjasë shumë. Duke nisur nga data 2 janar, pritet një ndryshim i menjëhershëm i motit, me futjen e një sistemi atmosferik që do të sjellë reshje të pakta, kryesisht në formë dëbore. Dëbora do të rikthehet në të gjitha zonat malore dhe do të afrohet edhe në qarkun e Shkodrës, Krujë dhe Elbasan, madje pritet të zbresë edhe në zonat e ulëta, por me sasi të vogla reshjesh.
Situata do të përkeqësohet më tej në datat 4 dhe 5 janar, kur priten reshje shiu me intensitet të lartë në pjesën më të madhe të vendit. Për shkak të rritjes së temperaturave, reshjet do të jenë kryesisht në formë shiu. Po ashtu, dita e diel dhe e hënë do të shoqërohen me erë shumë të fortë, ndërsa Ultësira Perëndimore pritet të përballet edhe me rrebeshe shiu.
Autoritetet këshillojnë qytetarët të tregojnë kujdes, veçanërisht në zonat malore dhe gjatë lëvizjeve në ditët me mot të përkeqësuar. /Skyweb.al
