Besmir Semanaj, ekspert i njohur i sigurisë kibernetike, ka reaguar publikisht lidhur me ndërprerjen e vazhdueshme të shërbimeve në Bashkinë e Tiranës, duke ngritur shqetësimin se kjo situatë është shndërruar nga një problem teknik në një dështim funksional me pasoja të drejtpërdrejta për qytetarët.
Sipas tij, gjatë ditëve të fundit janë raportuar dhjetëra ankesa nga qytetarë dhe punonjës të administratës për mosfunksionimin total ose vonesa serioze në ofrimin e shërbimeve në këtë institucion, për shkak të një problemi të dyshuar si sulm kibernetik apo infektim i sistemeve kompjuterike.
“Ndërkohë që mbështesim përpjekjet e sektorit IT për rikthimin e sistemeve, nuk mund të justifikohet pezullimi i shërbimeve publike për javë apo muaj. Administrata mund dhe duhet të kalojë përkohësisht në funksionim manual ,me firmë, vulë dhe protokoll fizik, ashtu siç lejohet nga ligji në raste të jashtëzakonshme”, deklaron Semanaj.
Ai paralajmëron se nëse brenda administratës ka struktura apo individë që po shmangin qëllimisht rikthimin e shërbimeve, atëherë situata kërkon verifikim të menjëhershëm për të përcaktuar nëse bëhet fjalë për shpërdorim detyre.
Eksperti kritikon mungesën totale të transparencës: “Kanë kaluar më shumë se dy javë dhe nuk ka ende asnjë informacion zyrtar për rikthimin e shërbimeve. Ky nivel pasigurie dhe mungesë llogaridhënieje është i papranueshëm dhe dëmton besimin e qytetarëve ndaj institucioneve.”
Në reagimin e tij, Semanaj bën thirrje për masa urgjente, duke përfshirë:
- Publikimin e një date zyrtare për rikthimin e shërbimeve;
- Transparencë mbi pajisjet e dëmtuara dhe masat për rikuperim;
- Zbatimin e një plani emergjent për rifillimin e shërbimeve në mënyrë manuale.
Në përfundim, ai thekson se “situata nuk është më një problem teknik, por një cenim serioz i të drejtës së qytetarëve për shërbime publike dhe një sinjal i rrezikshëm për funksionimin e shtetit.”/skyweb.al
