Bitcoin ka kaluar sot, më 9 maj 2025, kufirin historik të 100,000 dollarëve amerikanë, duke u ngjitur në mbi 103,600 USD dhe duke shënuar një nga momentet më të rëndësishme në historinë e tij pas nivelit 109 555 USD në shkurt 2025.
Kjo rritje vjen pas një periudhe të turbullt ku çmimi i kriptomonedhës kishte rënë ndjeshëm gjatë muajit prill, por rikuperimi i fundit ka qenë i shpejtë dhe i fuqishëm.
Faktorët që kanë shtyrë këtë ngjitje janë të ndërlidhur me zhvillime politike dhe ekonomike të javëve të fundit. Lajmi për një marrëveshje tregtare midis Shteteve të Bashkuara dhe Mbretërisë së Bashkuar, i nënshkruar nga Presidenti Trump, ka rritur optimizmin në tregjet globale, duke nxitur investime të reja në asete alternative si Bitcoin.
Për më tepër, politika të reja pro-kriptomonedhë të shpallura nga administrata amerikane, përfshirë krijimin e një Rezerve Strategjike të Bitcoin, kanë forcuar ndjeshëm perceptimin e tij si një pasuri strategjike.
Ndikimin e vet ka dhënë edhe ngjarja e fundit e “halving”-ut në prill 2024, që uli sasinë e Bitcoin të ri që futet në treg, ndërkohë që spekulimet për ulje të mundshme të normave të interesit nga Rezerva Federale i kanë shtuar edhe më shumë presionin pozitiv çmimit.
Tashmë, investitorët e mëdhenj institucionalë kanë hyrë fuqishëm në treg, duke e bërë Bitcoin jo vetëm më të vlefshëm, por edhe më të ndjeshëm ndaj çdo ndryshimi në sentimentin global.
Analistët janë të ndarë: disa parashikojnë një rritje të mëtejshme deri në 150,000 USD brenda këtij viti, ndërsa të tjerë paralajmërojnë se pas çdo ngjitjeje të vrullshme, rreziku i një korrigjimi të fortë mbetet real.
