Ndryshe nga atmosfera euforike e shfaqur nga ministri i Kulturës, Blendi Gonxhja, me balerina, eufori dhe performanca artistike, festimet e fundvitit brenda Partisë Socialiste janë karakterizuar këtë herë nga një ton i përmbajtur dhe dukshëm i matur.
Kryeministri Edi Rama ka zhvilluar një takim modest me socialistët e Tiranës, ku mungoi çdo shenjë feste tradicionale. Në aktivitetin e fundit për këtë vit, e vetmja figurë e nivelit të parë që mori fjalën ishte Ogerta Manastirliu, ndërsa vetë Rama u tregua i kursyer si në mesazh, ashtu edhe në simbolikë.
Ai ngriti dolli vetëm për strukturat e nivelit të dytë dhe të tretë të partisë, ndërkohë që vija e parë socialiste nuk ishte e pranishme, të paktën sipas pamjeve të publikuara nga vetë kryeministri në rrjetet sociale.
Ndryshe nga vitet e mëparshme, këtë fundvit socialistët janë treguar të rezervuar. Përjashtim bën vetëm Blendi Gonxhja, i cili publikoi pamje nga një festë e organizuar me stafin e ministrisë, ku dominonin dajret, balerinat dhe një atmosferë e theksuar entuziazmi.
Një pamje që nuk është parë më herët nga asnjë ministër tjetër i kabinetit.
Kontrasti mes këtyre dy qasjeve vjen në një moment veçanërisht delikat për qeverinë. Kabineti Rama ndodhet nën presion të fortë politik dhe ligjor, me hetime të SPAK-ut që kanë tronditur institucionet kryesore, ndërsa qeverisja digjitale është thuajse e paralizuar, me një pjesë të madhe të shërbimeve online jashtë funksioni, duke prekur drejtpërdrejt qytetarët dhe bizneset.
Në një klimë tensioni institucional dhe pasigurie politike, këto pamje gëzimi të tepruar kanë thelluar kontrastin dhe kanë nxitur debat mbi sensin e realitetit brenda qeverisë. /skyweb.al
