Kushtet e motit kanë ndryshuar ndjeshëm në juglindje të vendit, ku orët e para të mëngjesit kanë sjellë reshje dëbore dhe shiu në disa zona. Fenomenet atmosferike kanë ndikuar si në qarkullimin rrugor, ashtu edhe në situatën hidrike në disa bashki të qarkut Korçë.
Bora ka prekur një sërë zonash malore dhe turistike, ndërsa ndërhyrjet për pastrimin dhe kriposjen e rrugëve kanë nisur për të garantuar lëvizjen e automjeteve. Në disa akse po punohet me mjete të posaçme për të shmangur bllokimet dhe rrëshqitjet.
Probleme janë shfaqur edhe në infrastrukturën rrugore. Në një segment të aksit Ersekë–Leskovik është konstatuar dëmtim i pjesshëm i rrugës si pasojë e reshjeve gjatë natës, duke rritur rrezikun për qarkullimin e mjeteve. Ndërkohë, situata e ujërave mbetet e ndjeshme, me hidrovore që vijojnë punën për të mbajtur nën kontroll nivelet e larta.
Në Bashkinë Maliq, rritja e prurjeve ka sjellë dalje të lumit Devoll nga shtrati në disa pika, duke vënë në presion argjinaturat. Disa segmente rrugore janë përballur me batisje dhe dëmtime, ndërsa gjatë natës ka pasur edhe bllokime të përkohshme, të cilat janë zhbllokuar më pas.
Rrëshqitje dherash dhe rënie gurësh janë raportuar edhe në zona të tjera rurale, duke krijuar vështirësi për banorët dhe drejtuesit e mjeteve. Në disa fshatra dhe zona malore, reshjet e borës kanë arritur disa centimetra, ndërsa janë shënuar edhe probleme me furnizimin me energji elektrike.
Autoritetet lokale dhe strukturat përgjegjëse vijojnë monitorimin e situatës dhe u bëjnë thirrje qytetarëve të tregojnë kujdes në lëvizje, sidomos në akset malore dhe zonat e rrezikuara nga rrëshqitjet. /skyweb.al
