Viti 2025 shënoi një kthesë negative në një nga treguesit më të rëndësishëm të progresit global. Numri i vdekjeve të fëmijëve nën moshën pesë vjeç u rrit për herë të parë këtë shekull, duke ndërprerë një trend rënieje që kishte zgjatur më shumë se 25 vite.
Sipas vlerësimeve të publikuara në letrën vjetore për vitin 2026, vdekjet e fëmijëve nën pesë vjeç u rritën nga rreth 4.6 milionë në vitin 2024 në rreth 4.8 milionë në vitin 2025. Rritja vjen pas një periudhe ku ky tregues kishte rënë më shpejt se në çdo moment tjetër historik.
Në analizën e tij, Bill Gates thekson se ky regres lidhet drejtpërdrejt me uljen e mbështetjes financiare nga vendet e pasura drejt vendeve më të varfra, veçanërisht në fushën e shëndetësisë globale.
Sipas tij, shkurtimet e ndihmës ndërkombëtare kanë ndikuar në aksesin ndaj vaksinave, kujdesit shëndetësor bazë dhe programeve për parandalimin e sëmundjeve që janë jetike për fëmijët.
“Gjëja që më shqetëson më shumë është fakti se bota shkoi mbrapa vitin e kaluar në një tregues kyç të progresit.
Për 25 vite me radhë, vdekjet e fëmijëve nën pesë vjeç ranë me ritme historike. Por në vitin 2025, ky numër u rrit për herë të parë këtë shekull,” thuhet në deklarimin e tij.
Gates paralajmëron se pesë vitet e ardhshme do të jenë të vështira, ndërsa komuniteti ndërkombëtar përpiqet të rikthejë trendin pozitiv dhe të zgjerojë përdorimin e mjeteve që shpëtojnë jetë.
Ai thekson se pa një angazhim të ri financiar dhe politik nga vendet e zhvilluara, rreziku i përkeqësimit të mëtejshëm të situatës mbetet real.
Sipas raportit, rritja e vdekjeve të fëmijëve nuk lidhet me një faktor të vetëm, por me kombinimin e konflikteve, varfërisë, pasojave të pandemisë dhe, mbi të gjitha, me reduktimin e fondeve për shëndetin global, duke e kthyer vitin 2025 në një sinjal alarmi për politikat ndërkombëtare të zhvillimit. /skyweb.al
