Presidenti i Republikës ka dekretuar ligjin për Paqen Fiskale, duke i hapur rrugë hyrjes së tij në fuqi pas botimit në Fletoren Zyrtare.
Megjithatë, zbatimi konkret i këtij ligji mbetet i bllokuar për shkak të mungesës së akteve nënligjore që përcaktojnë procedurat e aplikimit.
Ligji parashikon që Marrëveshja e Paqes Fiskale të hyjë në fuqi 15 ditë pas botimit në Fletoren Zyrtare dhe të shtrijë efektet deri në vitin tatimor 2028.
Ajo do të zbatohet për një vit tatimor, me të drejtë rinovimi edhe për dy vite të tjera.
Pavarësisht interesit të lartë nga bizneset për të hyrë në këtë marrëveshje me administratën tatimore, kërkesat për momentin nuk po pranohen.
Administrata Tatimore ka sqaruar se aplikimet nuk mund të shqyrtohen pa u miratuar udhëzimet zbatuese, të cilat do të përcaktojnë mënyrën e aplikimit, kriteret, procedurat e komunikimit dhe kushtet e vlefshmërisë së marrëveshjes.
Sipas Ministrisë së Financave, udhëzimi për zbatimin e Paqes Fiskale duhet të miratohet brenda tre muajve nga hyrja në fuqi e ligjit. Vetëm pas këtij hapi, administrata tatimore do të nisë zbatimin praktik të marrëveshjes.
Ligji përcakton se marrëveshja realizohet përmes aplikimit elektronik nga tatimpaguesi në platformën “e-filing”, brenda afatit të dorëzimit të deklaratës vjetore të të ardhurave të vitit paraardhës.
Propozimi i marrëveshjes hartohet nga administrata tatimore dhe i komunikohet tatimpaguesit në mënyrë elektronike, duke përcaktuar nivelin e fitimit të tatueshëm dhe detyrimet tatimore për periudhën përkatëse.
Tatimpaguesi ka të drejtë ta pranojë ose ta refuzojë propozimin brenda afatit ligjor. Me pranimin dhe nënshkrimin elektronik, marrëveshja konsiderohet e lidhur dhe ka efekt ligjor për vitin tatimor përkatës. Mosrespektimi i kushteve të marrëveshjes trajtohet si shkelje tatimore.
Ligji parashikon gjithashtu rastet kur Paqja Fiskale humbet vlefshmërinë, përfshirë ndryshimin e veprimtarisë, mosrealizimin e rritjes minimale prej 18 për qind të fitimit të tatueshëm, ndërprerjen e aktivitetit, shkeljet e përsëritura tatimore, mospagimin e detyrimeve sipas marrëveshjes, ose realizimin e një rritjeje mbi 50 për qind të fitimit të tatueshëm krahasuar me vitin paraardhës.
Deri në miratimin e akteve nënligjore, Paqja Fiskale mbetet formalisht e miratuar, por praktikisht e pazbatueshme. /skyweb.al
