Kryeministri Edi Rama deklaroi se Shqipëria synon të shndërrohet në eksportuese të energjisë së rinovueshme drejt tregut europian, përmes një bashkëpunimi strategjik me Italinë dhe Emiratet e Bashkuara Arabe.
Duke folur në një panel të Samitit të Javës së Zhvillimit të Qëndrueshëm në Abu Dabi, Rama theksoi se sistemi energjetik shqiptar mbështetet tërësisht në burime të rinovueshme, kryesisht hidroenergji, duke e bërë vendin të varur nga kushtet klimatike.
Sipas tij, mungesa e reshjeve ka detyruar shpesh Shqipërinë të importojë energji, por kjo situatë po adresohet përmes investimeve të shtuara në energjinë diellore dhe atë të erës gjatë viteve të fundit.
Kryeministri u shpreh se objektivi është që deri në fund të vitit 2028 vendi të arrijë pavarësinë e plotë energjetike, duke mos pasur më nevojë për blerje energjie nga jashtë. Paralelisht, Shqipëria synon të krijojë një rol aktiv në tregun rajonal dhe europian të energjisë.
Në këtë kuadër, Rama nënvizoi rëndësinë e bashkëpunimit trepalësh me Emiratet e Bashkuara Arabe dhe Italinë, që parashikon krijimin e një baze prodhimi energjie në Shqipëri dhe lidhjen me tregun europian përmes kabullit ndërlidhës me Italinë.
Sipas tij, ambicia e këtij projekti është arritja e një kapaciteti prodhimi deri në 3 gigavat, me synimin që energjia e gjelbër shqiptare të shitet në tregjet e Bashkimit Europian, duke kthyer sektorin energjetik në një burim të rëndësishëm të ardhurash për vendin. /skyweb.al
