Rruga e Thethit është aktualisht e hapur për qarkullim, pas një mbylljeje të përkohshme të shkaktuar nga aktivizimi i ortekëve si pasojë e reshjeve të dendura të borës.
Sipas njoftimit zyrtar të ARRSH-së, në një segment rrugor me gjatësi rreth 550 metra vijon të jetë i pranishëm rreziku i ortekëve nga shpatet përreth. Ky rrezik rritet veçanërisht gjatë orëve të mesditës në ditët me mot të kthjellët, kur temperaturat më të larta nxisin shkrirjen e borës.
Për arsye sigurie, autoritetet bëjnë me dije se gjatë këtyre kushteve atmosferike do të ketë mbyllje provizore të qarkullimit deri në momentin kur temperaturat bien dhe bora ngrin sërish. Gjatë intervaleve kur ekziston rrezik, qarkullimi do të lejohet vetëm me asistencën e punonjësve të kompanisë së mirëmbajtjes, e cila ndodhet në terren në mënyrë të përhershme. /skyweb.al
