Pacienti i parë në Mbretërinë e Bashkuar që ka marrë një trajtim novator në kuadër të Shërbimit Shëndetësor Kombëtar (NHS) për një formë agresive të leuçemisë, e ka përshkruar përvojën si “fantastike” dhe “shumë sci-fi”.
Oscar Murphy, 28 vjeç, u trajtua me terapinë CAR-T, e njohur ndryshe si “ilaçi i gjallë”, në Spitalin Royal Infirmary të Mançesterit. BBC News ishte i pranishëm më 2 janar, kur Oscar mori infuzionin e parë nga dy të planifikuara, që përmbanin qelizat e tij imunitare të modifikuara gjenetikisht për të njohur dhe shkatërruar qelizat kancerogjene.
NHS England ka rënë dakord të financojë këtë imunoterapi në disa qendra në të gjithë vendin, ndërsa rreth 50 pacientë në vit pritet të përfitojnë nga ky trajtim.
Oscar u diagnostikua me leuçemi limfoblastike akute të qelizave B (B-cell ALL) në mars të vitit 2025. Ai iu nënshtrua kimioterapisë dhe një transplanti të qelizave burimore nga një dhurues në korrik, por në nëntor u njoftua se sëmundja ishte rikthyer.
“Leuçemia që kam është shumë agresive dhe përhapet shpejt. Ajo kërkon një përgjigje edhe më të shpejtë për ta ndalur. Tani kemi një zgjidhje për këtë,” u shpreh Oscar, shitës makinash nga qyteti Bury.
Sipas të dhënave nga një provë klinike, 77% e pacientëve kanë hyrë në remision pas trajtimit me CAR-T, ndërsa gjysma e tyre nuk kanë shfaqur më shenja kanceri edhe pas tre vitesh e gjysmë. Mesatarisht, trajtimi u ka shtuar pacientëve 15.6 muaj jetë.
Hematologia e Oscarit, Dr. Eleni Tholouli, tha se terapia CAR-T është më e sigurt se trajtimet ekzistuese, me më pak efekte anësore dhe shumë më efektive.
“Zakonisht, kjo formë leuçemie është jashtëzakonisht agresive dhe pacientët e rritur nuk jetojnë më shumë se gjashtë deri në tetë muaj. Me këtë terapi, ne mund t’u ofrojmë vite jetë dhe potencialisht një shërim të plotë. Është një hap shumë i rëndësishëm dhe po revolucionarizon mënyrën se si e trajtojmë këtë kancer,” tha ajo.
Terapia CAR-T është përdorur prej disa vitesh në NHS për disa lloje leuçemie dhe limfome, por kjo është hera e parë që zgjerohet për të rriturit me leuçemi limfoblastike akute të qelizave B, falë kësaj forme të re të trajtimit.
Muajin e kaluar, Oscarit iu morën qelizat T – një lloj qelize e bardhë e gjakut – të cilat u dërguan në një laborator në Stevenage. Aty ato u riprogramuan me anë të një virusi të padëmshëm për të futur një sekuencë gjenetike që i lejon të identifikojnë kancerin.
Qelizat e modifikuara zhvillojnë receptorë të rinj në sipërfaqe, të cilët lidhen me qelizat kancerogjene si “çelës dhe bravë”, duke i shënjuar për shkatërrim. Këto qeliza njihen si qeliza CAR-T dhe shumëfishohen në laborator për të krijuar miliona kopje.
Trajtimi i personalizuar i Oscarit u ruajt në temperatura shumë të ulëta dhe u dërgua në Spitalin Royal Infirmary. Një qese e vogël, që përmbante rreth 100 milionë qeliza CAR-T në vetëm tre lugë çaji lëng, u infuzua në gjakun e tij për vetëm pak minuta, duke shënuar një moment historik në trajtimin e leuçemisë në NHS. /skyweb.al
