Administrata Trump pritet të pezullojë nga data 21 janar lëshimin e vizave të emigracionit për rreth 75 vende, mes të cilave përfshihen edhe Shqipëria dhe Kosova.
Masa bazohet në një udhëzim të brendshëm të Departamentit Amerikan të Shtetit dhe lidhet drejtpërdrejt me politikat e reja të emigracionit në kuadër të parimit “Amerika së Pari”.
Sipas informacionit të publikuar nga mediat amerikane, pezullimi nuk prek vizat jo-emigruese.
Kjo do të thotë se vizat turistike dhe studentore vijojnë të lëshohen normalisht.
Po ashtu, masa nuk do të zbatohet për udhëtimet e lidhura me evente ndërkombëtare, përfshirë edhe Kupën e Botës që do të zhvillohet këtë verë në Shtetet e Bashkuara.
Ndërkohë, pezullimi prek drejtpërdrejt kategoritë kryesore të vizave emigruese. Në këtë listë përfshihen vizat për bashkim familjar, vizat e punësimit të përhershëm, vizat për birësim, programet për emigrantë specialë si edhe lotaria amerikane e diversitetit.
Për këto kategori, përpunimi dhe miratimi i aplikimeve do të ndalet përkohësisht.
Vendimi mbështetet në zbatimin më të ashpër të parimit ligjor të njohur si “public charge”, i cili synon të ndalojë hyrjen në SHBA të personave që mund të bëhen barrë për sistemin e ndihmës publike. Sipas autoriteteve amerikane, ngrirja e përpunimit të vizave synon vendet nga të cilat një pjesë e konsiderueshme e emigrantëve përfundojnë duke përfituar nga skemat sociale.
Udhëzimet e reja parashikojnë që oficerët konsullorë të kryejnë vlerësime më të thelluara për aplikantët, duke marrë parasysh gjendjen shëndetësore, moshën, aftësinë për të komunikuar në anglisht, situatën financiare si dhe rrezikun për nevoja të kujdesit shëndetësor afatgjatë. Aplikantët më të moshuar, me probleme shëndetësore ose me histori përfitimi nga ndihmat sociale, pritet të përballen më shpesh me refuzime.
Departamenti Amerikan i Shtetit ka bërë të ditur se kjo masë do të mbetet në fuqi deri në një rishikim të plotë të politikave të emigracionit, me qëllim garantimin që emigrantët e rinj të mos përbëjnë barrë për taksapaguesit amerikanë. Për Shqipërinë dhe Kosovën, kjo nënkupton një bllokim të përkohshëm të emigracionit të përhershëm, por jo të udhëtimeve të përkohshme drejt SHBA-së. /skyweb.al
