Një qytetar denoncon publikisht një rast të rëndë mashtrimi përmes platformës Booking.com, që përfundoi me prishjen totale të udhëtimit dhe kthimin e detyruar në Tiranë.
Sipas denoncimit, qytetari kishte rezervuar një natë qëndrimi në Prishtinë për katër persona tek apartamentet “Central Lux Apartamens Prishtine”. Rreth orës 14:00, ai kishte komunikuar drejtpërdrejt me pronarin e apartamentit, i cili e kishte siguruar se rezervimi ishte i konfirmuar dhe gjithçka ishte në rregull.
Por në momentin e mbërritjes në Prishtinë, rreth orës 20:00, situata mori një kthesë skandaloze. Pronari i apartamentit ndërpreu çdo komunikim, nuk iu përgjigj më telefonatave dhe u zhduk pa dhënë asnjë sqarim.
Si pasojë, katër persona mbetën pa strehim në mbrëmje dhe në fundjavë, në një moment kur gjetja e një alternative ishte pothuajse e pamundur. Vetëm hotelet kishin vende të lira, por me çmime shumë të larta dhe të papërballueshme.
Të lënë pa asnjë zgjidhje, qytetari dhe tre personat e tjerë u detyruan të kthehen në Tiranë, duke humbur kohë, shpenzime dhe duke përjetuar një situatë stresuese dhe të papranueshme.
Ajo që e bën rastin edhe më shqetësues është fakti se kjo sjellje nuk është e izoluar. Sipas komenteve të publikuara si në Booking.com ashtu edhe në Google, qytetarë të tjerë kanë raportuar të njëjtin problem:
– rezervime të konfirmuara
– mungesë totale komunikimi
– pronari që nuk u përgjigjet telefonatave në momentin e mbërritjes
Kjo tregon se kemi të bëjmë me një praktikë të përsëritur, e cila ka lënë disa vizitorë pa strehim dhe pa zgjidhje, duke dëmtuar seriozisht besimin tek rezervimet online.
Qytetari kërkon që rasti të bëhet publik për të paralajmëruar të tjerët, si dhe që platforma Booking të marrë masa urgjente ndaj këtij subjekti, për të shmangur përsëritjen e situatave të tilla.
