Tarifa për të prenotuar një dhomë në hotelin e parë që pritet të hapet në Hënë mund të arrijë deri në 1 milion dollarë. Ideja vjen nga një start-up kalifornian, i cili synon të tërheqë turistë hapësinorë për një strukturë që, për momentin, ekziston vetëm në fazë koncepti. Sipas projektit, hoteli i parë hënor parashikohet të hapë dyert në vitin 2032.
Kompania Galactic Resource Utilization Space (GRU) është themeluar nga një 21-vjeçar, i diplomuar në inxhinieri në Universitetin prestigjioz të Berkeley-t. Në një deklaratë zyrtare, GRU bën të ditur se planifikon të përdorë sisteme modulare banimi dhe procese të automatizuara për të shndërruar sipërfaqen e Hënës në struktura të forta dhe të qëndrueshme, të përshtatshme për praninë njerëzore gjatë qëndrimit dhe eksplorimit hapësinor.
Ndërtimi i strukturës pritet të nisë në vitin 2029, megjithëse projekti mbetet ende në pritje të rregullimit dhe miratimit legjislativ.
Për turistët që do të rezervojnë një vend në këtë eksperiencë historike, tarifa e prenotimit do të variojë nga 250 mijë deri në 1 milion dollarë. Përveç kësaj, do të aplikohet edhe pagesa për qëndrimin në hotelin hënor, e cila ende nuk është përcaktuar përfundimisht, por vlerësohet të jetë rreth 10 milionë dollarë. /skyweb.al
