Një studim i ri evropian tregon se përdorimi i paracetamolit gjatë shtatzënisë është i sigurt dhe nuk lidhet me rritje të rrezikut për autizëm apo çrregullime zhvillimore tek fëmijët.
Rishikimi shkencor, i botuar në revistën The Lancet Obstetrics, Gynaecology & Women’s Health, përfshiu 43 studime të cilësisë së lartë me qindra mijëra gra shtatzëna. Në analizë u krahasuan gratë që kishin përdorur paracetamol gjatë shtatzënisë me ato që nuk e kishin përdorur.
Për të përjashtuar ndikimin e faktorëve të tjerë, si gjenetika apo ambienti familjar, studiuesit analizuan edhe të dhëna nga vëllezër e motra, duke e cilësuar këtë metodë si “standardin e artë” të kërkimit shkencor. Ekspertë nga Britania e Madhe dhe Shtetet e Bashkuara e kanë përshëndetur studimin, duke theksuar se ai ndihmon në uljen e pasigurive dhe ankthit tek gratë shtatzëna.
Studimi vjen pas deklaratave të debatueshme të presidentit amerikan Donald Trump, i cili vitin e kaluar u bëri thirrje grave shtatzëna të shmangnin paracetamolin, duke e lidhur atë me rrezikun për autizëm. Megjithatë, gjetjet e reja shkencore nuk gjejnë asnjë lidhje të drejtpërdrejtë mes përdorimit të këtij ilaçi dhe problemeve neurozhvillimore tek fëmijët.
Ekspertët këshillojnë që paracetamoli të përdoret gjithmonë në dozën më të ulët të nevojshme, pasi dhimbja ose ethet e patrajtuara gjatë shtatzënisë mund të rrisin rrezikun e komplikacioneve, si lindja e parakohshme apo humbja e shtatzënisë.
