Monedha europiane ka shënuar një tjetër rënie në tregun valutor vendas, duke regjistruar një minimum të ri historik ndaj Lekut. Sipas kursit zyrtar të publikuar nga Banka e Shqipërisë, Euro u këmbye ditën e mërkurë me 96.44 lekë, niveli më i ulët i shënuar ndonjëherë.
Ky zhvillim vjen në një periudhë kur tradicionalisht pritet një forcim i lehtë i Euros gjatë muajit janar, por këtë vit tregu ka ndjekur një ecuri të kundërt.
Edhe në javët e para të vitit 2026, monedha europiane ka mbetur pranë niveleve më të dobëta historike, duke thyer edhe pragun e shënuar në fund të dhjetorit.
Sipas operatorëve të këmbimit valutor, rënia lidhet kryesisht me kërkesën e ulët për Euro, ndërkohë që oferta në treg mbetet e qëndrueshme. Kjo balancë ka ushtruar presion të vazhdueshëm në kurs, duke favorizuar mbiçmimin e Lekut.
Një tjetër element që ka ndikuar në këtë situatë është mungesa e efektit të zakonshëm të shpenzimeve buxhetore. Në vitet e kaluara, fundviti shoqërohej me rritje të qarkullimit të Lekut dhe dobësim të përkohshëm të monedhës vendase, por gjatë dhjetorit 2025 dhe janarit 2026 ky ndikim ka qenë minimal.
Forcimi i Lekut ka qenë një tendencë e qëndrueshme edhe gjatë vitit të kaluar.
Sipas të dhënave zyrtare, Banka e Shqipërisë ndërhyri në mënyrë aktive në treg, duke blerë 825.6 milionë euro gjatë nëntë muajve të parë të vitit 2025, niveli më i lartë historik i regjistruar për këtë periudhë.
Këto blerje shënuan një rritje prej mbi 52 për qind krahasuar me të njëjtën periudhë të vitit paraardhës, duke synuar ngadalësimin e rënies së mëtejshme të kursit Euro-Lek.
Gjatë vitit 2025, kursi mesatar i këmbimit vijoi rënien për të pestin vit radhazi, me Euron që u këmbye mesatarisht me 97.85 lekë, niveli më i ulët vjetor i regjistruar deri më sot.
Megjithatë, ritmi i rënies ishte më i moderuar krahasuar me vitet 2023 dhe 2024.
Euro e mbylli vitin 2025 në nivelin 96.77 lekë, rreth 1.4 për qind më poshtë krahasuar me fundin e vitit 2024. Ndërkohë, të dhënat e para të vitit 2026 tregojnë se presioni rënës mbi monedhën europiane po vijon, duke konfirmuar një fazë të re forcimi të Lekut në tregun valutor shqiptar. /skyweb.al
