Gjatë vitit 2025 është shënuar një rënie e ndjeshme e aksidenteve rrugore. Sipas të dhënave të Institutit të Statistikave (INSTAT), numri total i aksidenteve arriti në 1 375, ose 17,5% më pak krahasuar me vitin paraardhës. Vetëm në muajin dhjetor 2025 u regjistruan 130 aksidente rrugore.
INSTAT bën të ditur se në dhjetor janë aksidentuar gjithsej 176 persona, përfshirë të plagosur dhe viktima me humbje jete, ndërsa thekson se këto të dhëna janë paraprake dhe mund të përditësohen. Në përgjithësi, për periudhën janar–dhjetor 2025, aksidentet rrugore kanë shënuar një ulje prej 17,5% në raport me të njëjtën periudhë të një viti më parë.
Sipas vlerësimeve, në 87,7% të rasteve aksidentet kanë ndodhur si pasojë e sjelljes së drejtuesve të mjeteve. Grupmoshat e reja vijojnë të jenë faktor dominues, ku më problematikja mbetet ajo 25–34 vjeç, e cila përbën 33,1% të numrit total të aksidenteve.
Sa i përket shpërndarjes sipas ditëve, gjatë dhjetorit 2025 numri më i lartë i aksidenteve është regjistruar të premten, me 20% të totalit, ndërsa më pak aksidente janë shënuar të mërkurën dhe të dielën, me nga 10,8% secila. Nga ana tjetër, intervali kohor më i rrezikshëm rezulton të jetë 14:00–17:00, ku është regjistruar 22,3% e aksidenteve rrugore. /skyweb.al
