Përmes një njoftimi zyrtar, Tatimet deklarojnë se problematika e konstatuar gjatë ditëve të fundit është zgjidhur dhe se prej pasdites së së enjtes, më 28 janar, Platforma Qendrore e Lëshimit të Faturave të Fiskalizuara funksionon normalisht.
Sipas Administratës Tatimore, sistemi tashmë është në shërbim të plotë, duke i dhënë fund një situate që për gati dhjetë ditë ka penguar lëshimin e faturave dhe vijimësinë normale të punës për mijëra subjekte.
Megjithatë, Tatimet kanë rikujtuar procedurat që duhet të ndjekin bizneset në rastet kur hasen vështirësi teknike në fiskalizim.
Për tatimpaguesit që përdorin softëare për lëshimin e faturave, rreth 139 mijë subjekte duhet të vijojnë normalisht me lëshimin e faturave edhe në rastet kur ato nuk pajisen menjëherë me kodin unik NIVF. Sapo platforma të jetë plotësisht funksionale, faturat e pafiskalizuara duhet të fiskalizohen duke u siguruar që secila të pajiset me kodin përkatës.
Ndërkohë, për rreth 3 mijë tatimpagues që nuk disponojnë softëare fiskalizimi dhe përdorin platformën qendrore, Tatimet sqarojnë se ata mund të pajisen me softëare të përshtatshëm ose t’i drejtohen Drejtorisë Rajonale Tatimore për t’u pajisur me bllokun e veçantë të faturave, sipas parashikimeve ligjore. Ky bllok përdoret edhe në rast defekti apo ndërprerjeje të plotë të sistemit, ndërsa faturat e lëshuara duhet të raportohen brenda afateve ligjore.
Sa i përket zhdoganimit të mallrave, Administrata Tatimore kujton se afati ligjor për fiskalizimin është 7 ditë nga data e daljes së mallit në qarkullim të lirë. Në rastet kur ky afat tejkalohet për shkak të problemeve teknike të platformës, drejtoritë rajonale do të shqyrtojnë situatat rast pas rasti.
Administrata Tatimore u bën thirrje tatimpaguesve të ndjekin udhëzimet zyrtare, me qëllim garantimin e vijimësisë së aktivitetit dhe respektimin e detyrimeve ligjore në fuqi. /skyweb.al
