Gazetarja Klodiana Lala ka hedhur dritë mbi drejtimin kryesor të hetimeve që SPAK po zhvillon ndaj kompanisë Bankers Petroleum, duke theksuar se nyja e zbardhjes së kësaj çështjeje nuk ndodhet në Shqipëri, por jashtë saj.
E ftuar në emisionin “Të Paekspozuarit” në MCN TV, Lala tha se prokurorët janë duke u përqendruar te një institucion bankar i nivelit të dytë në Austri, i cili dyshohet se ka luajtur një rol vendimtar në skemën e dyshuar të shmangies së taksave dhe pastrimit të parave.
Sipas saj, hetimi nuk kufizohet vetëm te aktiviteti financiar i kompanisë, por shtrihet edhe te roli i disa ministrave dhe ish-ministrave, si dhe te kompani apo individë që dyshohet se kanë ndihmuar Bankers Petroleum në ndërtimin dhe funksionimin e kësaj skeme.
Nga të dhënat e deritanishme të dosjes hetimore, rezulton se llogaritë e kompanisë në Shqipëri janë bosh dhe paraqiten me humbje, ndërkohë që për vite me radhë Bankers ka deklaruar rezultate financiare negative dhe nuk ka paguar detyrime tatimore. Në të kundërt, sipas Lalës, dyshimet janë se pagesa të rëndësishme janë kryer jashtë vendit, përmes një banke austriake, në mënyrë selektive dhe të targetuar.
Ajo theksoi se SPAK ka nisur letërporosi drejt Austrisë për të siguruar informacion mbi këto transaksione, me synimin për të identifikuar përfituesit finalë të pagesave. Sipas saj, vetëm analiza e këtyre transfertave financiare mund të zbulojë se cilët zyrtarë, kompani, studio ligjore, subjekte lobimi apo struktura të tjera kanë përfituar nga afera Bankers.
Lala u shpreh se bëhet fjalë për shuma shumë të mëdha parash dhe për një skemë të dyshuar pastrimi parash në përmasa të konsiderueshme, ku përfshirja e kompanive offshore e bën edhe më të vështirë ndjekjen e gjurmës financiare. Ajo shtoi se hetimi aktualisht është përqendruar në këtë drejtim, ndërsa disa letërporosi janë dërguar nga prokuroret e SPAK, Anita Jella dhe Enkelejda Millonai.
Sa i përket origjinës së çështjes, hetimet ndaj Bankers Petroleum nisën në verën e vitit 2024, kur Hetimi Tatimor konstatoi një skemë të dyshuar abuzimi me pasoja të mëdha financiare për buxhetin e shtetit. Zyrtarë dhe përfaqësues të kompanisë u vunë nën akuzë për vepra penale si fshehje të ardhurash, pastrim parash, shpërdorim detyre dhe moskryerje detyrash nga organet tatimore.
Hetimet fillestare të Prokurorisë së Fierit zbuluan se kompania kishte deklaruar humbje për rreth 20 vite, ndërkohë që nga viti 2004 deri në 2024 kishte eksportuar dhe shitur në tregun vendas rreth 532 miliardë lekë naftë. Sipas autoriteteve, kjo skemë ka shërbyer për shmangien e detyrimeve tatimore dhe për përfitim fiktiv të TVSH-së, duke i shkaktuar shtetit një dëm që llogaritet në miliona euro.
Aktualisht, dosja është në kompetencë të SPAK dhe pritet që zhvillimet e ardhshme të hedhin më shumë dritë mbi përmasat reale të aferës dhe përgjegjësitë konkrete. /skyweb.al
