Një aplikacion me emër të zymtë ka tërhequr vëmendje të madhe në Kinë dhe është kthyer në aplikacionin me pagesë më të shkarkuar në vend. I quajtur “Are You Dead?” (“A je i vdekur?”), aplikacioni ka një funksion të thjeshtë: përdoruesit duhet të konfirmojnë çdo dy ditë se janë gjallë, duke klikuar një buton. Nëse nuk e bëjnë këtë, aplikacioni njofton kontaktin e tyre të emergjencës se diçka mund të mos shkojë mirë, sipas BBC.
Edhe pse u lançua në maj të vitit të kaluar pa shumë bujë, aplikacioni ka shpërthyer në popullaritet javët e fundit, veçanërisht mes të rinjve që jetojnë vetëm në qytetet e mëdha kineze. Sipas mediave shtetërore kineze, deri në vitin 2030 në Kinë mund të ketë deri në 200 milionë familje me një person, një prirje që ka shtuar ndjenjën e izolimit dhe pasigurisë.
Aplikacioni përshkruhet si një “shoqërues sigurie” për persona që jetojnë vetëm, punonjës zyrash, studentë larg familjes apo njerëz që kanë zgjedhur një stil jete të vetmuar. Në rrjetet sociale kineze, shumë përdorues shprehen se frika më e madhe është të vdesin pa u vënë re nga askush.
Një prej tyre, Wilson Hou, 38 vjeç, që punon në Pekin dhe jeton larg familjes për arsye pune, thotë se kjo ishte arsyeja kryesore pse e shkarkoi aplikacionin. “Kam frikë se nëse më ndodh diçka, askush nuk do ta kuptojë. Prandaj kam vendosur nënën time si kontakt emergjence,” shprehet ai.
Megjithatë, emri i aplikacionit ka shkaktuar edhe kritika. Disa e konsiderojnë ogurzi dhe sugjerojnë që të ndryshohet në diçka më pozitive, si “A je mirë?” apo “Si je?”. Kompania zhvilluese, Moonscape Technologies, ka pranuar kritikat dhe po shqyrton mundësinë e një ndryshimi emri. Ndërkombëtarisht, aplikacioni njihet me emrin Demumu dhe renditet ndër më të shkarkuarit në disa vende si SHBA, Singapori, Hong Kongu, Australia dhe Spanja.
Aplikacioni kushton vetëm 8 juanë (rreth 1 dollar amerikan), por vlera e kompanisë është rritur ndjeshëm. Themeluesit, tre të rinj të lindur pas vitit 1995 thonë se po kërkojnë investime dhe po mendojnë të zgjerojnë shërbimin, përfshirë edhe një produkt të veçantë për të moshuarit, në një vend ku mbi 20% e popullsisë është mbi 60 vjeç.
Edhe pse kompania nuk ka komentuar për mediat ndërkombëtare, suksesi i aplikacionit tregon qartë ankthin dhe pasigurinë në rritje të një shoqërie ku gjithnjë e më shumë njerëz jetojnë vetëm. /skyweb.al
