I pyetur mbi veprimet që do të ndërmarrë shumica parlamentare, Lamallari deklaroi se mazhoranca e ka bërë të qartë qëndrimin e saj përmes nismës së kryeministrit për t’iu drejtuar Gjykatës Kushtetuese.
Sipas ministrit, thelbi i këtij veprimi lidhet me pretendimin për tejkalim kompetencash nga ana e Gjykatës së Posaçme. Ai theksoi se bëhet fjalë për një përplasje mes pushteteve, ku ekzekutivi vlerëson se pushteti gjyqësor ka shkuar përtej rolit të tij kushtetues.
Lamallari nënvizoi se në këtë proces përfshihet edhe pushteti legjislativ, i cili ka përgjegjësinë për konfirmimin e mandateve të ministrave.
Ai rikujtoi se Kushtetuta përcakton qartë se ministrat gëzojnë të njëjtin status imuniteti si deputetët.
Deklaratat u bënë në një dalje publike ku ministri i Drejtësisë komentoi edhe çështje të tjera të aktualitetit, përfshirë amnistinë penale, për të cilën ai bëri me dije se rreth 10 mijë persona pritet të përfitojnë, ndërsa 338 të dënuar do të lirohen.
Pyetje: Cili është qëndrimi që mazhoranca do të mbaje për imunitetin e Ballukut?
Lamallari: Besoj që qëndrimi i mazhorancës ka qenë i qartë. Kryeministri ka ushtruar të drejtën e tij për të vënë në lëvizje gjykatën kushtetuese, argumentet janë paraqitur aty, ku në thelb qëndron pretendimi i një pushtetit, konkretisht ekzekutivi për tejkalim të pushtetit të një pushteti tjetër, pra pushteti gjyqësor. Këtu kemi të bëjmë edhe me pushtetin legjislativ që konfirmon mandatin e ministrave, përfshirë edhe mua. Kushtetuta e thotë qartë që ministrat gëzojnë imunitetin e deputetëve. /skyweb.al
