Autoriteti Evropian i Sigurisë Ushqimore (EFSA) ka përcaktuar një dozë maksimale ditore të sigurt për toksinën cereulidë tek foshnjat, pas dyshimeve për kontaminim të qumështit formulë, i cili çoi në tërheqje produktesh nga tregu në mbi 60 vende, raportoi “Euractiv”.
Cereulida, një toksinë e prodhuar nga bakteri Bacillus cereus, mund të shkaktojë të përziera, të vjella dhe diarre, ndërsa tek foshnjat e vogla rrezikon të çojë në dehidratim.
Që nga muaji dhjetor, prodhues të mëdhenj të qumështit formulë, përfshirë “Nestlé”, “Lactalis” dhe “Danone”, kanë nisur tërheqje paraprake të serive të produkteve në mbarë botën, pasi u zbulua prania e cereulidës.
Në këtë kontekst, Komisioni Evropian i kërkoi EFSA-s të ofronte këshilla urgjente shkencore dhe të propozonte një prag sigurie të harmonizuar në nivel të BE-së, që do të shërbente si standard për nisjen e tërheqjeve nga tregu.
EFSA njoftoi se ekspertët e saj kishin vendosur një “dozë referimi akute” për cereulidën tek foshnjat – sasia maksimale që mund të gëlltitet në mënyrë të sigurt brenda një dite – në nivelin 0,014 mikrogramë për kilogram të peshës trupore. Ky prag vlen për foshnjat nën moshën 16 javëshe.
Vendimi përputhet me njoftimin e autoriteteve franceze, të cilat kanë ulur pragun kombëtar të sigurisë nga 0,3 mikrogramë për kilogram në 0,014 mikrogramë për kilogram.
Megjithëse nuk janë konfirmuar raste zyrtare kontaminimi, hetimet në Francë po vazhdojnë pas vdekjes së dy foshnjave në janar, të cilat kishin konsumuar formulën “Guigoz” të prodhuar nga “Nestlé”. Ndërkohë, Qendra Evropiane për Parandalimin dhe Kontrollin e Sëmundjeve (ECDC) raportoi raste diarreje tek fëmijët pas konsumimit të produkteve të tërhequra.
Pasi “Nestlé” konfirmoi se burimi i kontaminimit ishte përbërësi vaj i acidit arakidonik (ARA), autoritetet franceze po përqendrojnë vëmendjen te një prodhues me bazë në Kinë, i dyshuar si burimi i serisë së kontaminuar.
Kritikët kanë akuzuar si kompanitë ashtu edhe autoritetet publike për vonesa në dhënien e paralajmërimeve. Sipas “Financial Times”, “Nestlé” informoi autoritetet holandeze më 10 dhjetor se testimet e brendshme kishin zbuluar kontaminim në një fabrikë, ndërsa tërheqjet nga tregu nisën vetëm më 5 janar, pas disa javësh analizash të përbërësve.
Më 29 janar, organizata për mbrojtjen e konsumatorit “Foodwatch” njoftoi se do të paraqiste një ankesë së bashku me tetë familje, fëmijët e të cilave u sëmurën pasi konsumuan formulë për foshnje të prodhuar nga “Nestlé”, “Lactalis” dhe “Vitagermine”.
“Kompanitë kanë treguar një neglizhencë të frikshme duke vonuar paralajmërimet”, deklaroi Ingrid Kragl, drejtoreshë e informacionit në “Foodwatch France”.
Nga ana e saj, “Nestlé” tha se kishte ndërmarrë të gjitha hapat e nevojshëm në bashkëpunim me autoritetet në vendet e prekura për të tërhequr produktet potencialisht të rrezikuara dhe se, deri tani, asnjë raport mjekësor nuk ka konfirmuar një lidhje të drejtpërdrejtë mes produkteve të saj dhe rasteve të sëmundjes.
