Emirjon Senja
Autoriteti Kombëtar për Sigurinë Kibernetik (AKSK) pranoi sot publikisht, përmes një sinkroni të shkurtër në një kronikë televizive se në Shqipëri ishin instaluar dhe futur në funksion pajisjet Deep Packet Inspection (DPI) siç u paralajmëruar fillimisht nga Besmir Semanajdhe u konfirmua më pas edhe nga burime të tjera.
Pajisjet janë vendosur te kompanitë celulare dhe fill pas tyre u bllokua Tik Tok-u (vetëm për përdoruesit e rrjetit mobile).
Prej gati një jave i kam nisur kërkesa për informacion institucioneve përgjegjëse për këtë çështje në Shqipëri dhe aktorëve të tregut dhe ende po pres për një përgjigje.
Ekspertët e fushës janë ata që bëjnë vlerësimin nga ana teknike, por duket se kemi të bëjmë me një mungesë të theksuar transparence për një veprim, për të cilin nuk ka prova që është bërë mbi një bazë ligjore që rregullon këtë proces.
Drejtori i AKSK tha se siguronte shqiptarët që nuk po përgjoheshin por nuk morën vesh nëse ka ndonjë udhëzim apo praktikë që rregullon menaxhimin e të dhënave.
Pyetja që kanë të gjithë është se kush i ka duart te këto pajisje, tekniku i Vodafone Albania ose One Albania apo punonjësi i AKSK?
Po ashtu, nuk dijmë ende se çfarë ndodh nëse njëri nga këta punonjës “çmendet”, urdhërohet apo paguhet që të filtrojë trafikun e X individi, gazetari, biznesmeni, politikani, gjykatësi apo prokurori? Kush mban përgjegjësi për këtë ?
Për shembull, si e ndalon AKSK, Vodafone Albania apo One Albania një situatë hipotetike sikur një biznesmen të paguajë një nga teknikët që kanë akses te pajisjet për të filtruar trafikun e një rivali në biznes për të parë se cilat faqe akseson përmes celularit dhe lap top-it të tij?
Duhet të mësojmë po ashtu se kush i ka sjellë këto pajisje këtu, janë blerë nga shteti shqiptar? Nëse po, ka një procedurë prokurimi? Apo janë donacion? Nëse janë donacion, a ka pritshmëri donatori pasi kësaj “dhurate”?
AKSK u kujdes që të thotë se DPI do të përdoren vetëm për një 1 vit deri sa të merren vesh me Tik Tok për vendosjen e filtrave, por çfarë ndodh nëse Tik Tok thotë nuk vendos filtrat?
Nëse thuhet këto pajisje na mbrojnë nga hakerat dhe janë kaq të mira, pse përforcohet mesazhi që do të përdoren vetëm për një vit? Duket qartë që ka një sforco të autoriteteve për të ligjëruar një veprim që është bërë pa ligj.
Po na thonë mos u frikësoni nga ne, por nga hakerat dhe pasi ne po ju mbrojmë.
Një teknik që nuk vepron sipas një kuadri rregullator, në fakt nuk ndryshon shumë nga një haker.
Kjo më kujton atë fabulën e famshme sipas të cilës, delja frikësohet gjithë jetën nga ujku dhe në fund e ther dhe ha bariu.
A nuk na mori të gjithëve më qafë AKSHI edhe pse ka harxhuar qindra miliona euro për këto platformat? /skyweb.al
