Një filxhan çaji ose kafeje në ditë mund të sjellë më shumë përfitime sesa thjesht energji për të nisur mëngjesin.
Sipas një studimi të ri nga Universiteti i Harvardit, konsumimi i rregullt i kafesë dhe çajit me kafeinë lidhet me një rrezik më të ulët për zhvillimin e demencës dhe me ruajtje më të mirë të aftësive njohëse, krahasuar me personat që nuk i konsumojnë këto pije. Gjetjet janë publikuar nga “The Independent”.
Studimi analizoi të dhënat e rreth 131 mijë profesionistëve të shëndetit në SHBA, përfshirë 86 mijë infermiere dhe 45 mijë punonjës të tjerë shëndetësorë, të ndjekur për një periudhë mesatare prej 43 vitesh. Pjesëmarrësit plotësonin pyetësorë ushqimorë çdo dy deri në katër vjet, ku raportonin sasinë e kafesë me dhe pa kafeinë, si dhe çajin që konsumonin. Gjatë viteve, ata iu nënshtruan edhe testeve të përsëritura njohëse.
Gjatë periudhës së ndjekjes u regjistruan 11 033 raste të demencës. Analiza tregoi se konsumimi më i lartë i kafesë me kafeinë shoqërohej me një ulje rreth 18% të rrezikut për demencë, ndërsa te konsumuesit e çajit rreziku ishte rreth 16% më i ulët. Po ashtu, këta individë shfaqnin një rënie më të ngadaltë të funksioneve njohëse me kalimin e kohës.
Studiuesit vunë re se kafeja pa kafeinë nuk tregoi lidhje me uljen e rrezikut të demencës apo me përmirësim të performancës njohëse. Përfitimet më të dukshme u panë te konsumi i moderuar: dy deri në tre filxhanë kafe me kafeinë në ditë ose një deri në dy filxhanë çaji, pa përfitime shtesë nga sasi më të mëdha.
Autori kryesor i studimit, Yu Zhang nga Shkolla e Shëndetit Publik “TH Chan” në Harvard, theksoi se demenca përbën një nga sfidat më të mëdha globale të shëndetit publik dhe se trajtimet efektive janë ende të kufizuara. Sipas tij, identifikimi i faktorëve të stilit të jetesës që mund të lidhen me rrezikun e demencës është thelbësor, veçanërisht kur bëhet fjalë për pije që konsumohen gjerësisht në mbarë botën.
Megjithatë, ekspertët paralajmërojnë se studimi tregon një lidhje statistikore dhe jo një marrëdhënie shkak-pasojë. Susan Kohlhaas nga “Alzheimer’s Research UK” vuri në dukje se konsumuesit e kafesë dhe çajit mund të kenë edhe zakone të tjera jetese që ndikojnë në shëndetin e trurit, ndërsa diagnozat janë pjesërisht të vetëraportuara. Ndërkohë, Tara Spires-Jones nga “UK Dementia Research Institute” theksoi se faktorë si gjumi dhe shëndeti kardiovaskular mund të luajnë rol, dhe se të dhënat për kafeinën janë mbledhur në intervale disa vjeçare, çka mund të ndikojë në saktësinë e tyre.
Sipas studiuesve, edhe një ndikim i moderuar i kafesë dhe çajit mund të ketë rëndësi të madhe në nivel popullsie, duke ofruar një arsye më shumë për t’i përfshirë këto pije në përditshmëri, gjithmonë me masë.
