Këshilli i Ministrave ka vendosur ndryshimin e strukturës së pagave për punonjësit e Shërbimit të Mbrojtjes nga Zjarri dhe Shpëtimin, duke parashikuar rritje për vitin buxhetor 2026.
Sipas vendimit të propozuar nga Ministri i Shtetit për Administratën Publike dhe Antikorrupsionin, e gjithë struktura e pagave do t’i nënshtrohet një indeksimi në masën 2.5 për qind. Ky indeksim do të zbatohet për të gjitha gradat, si reflektim i rritjes së përgjithshme të kostos së jetesës.
Përtej këtij indeksimi, qeveria ka vendosur një rritje shtesë të pagës për gradat operacionale, duke synuar mbështetjen e punonjësve që janë në vijën e parë të shërbimit.
Gradat që përfitojnë rritje përtej indeksimit janë: asistent zjarrfikës, zjarrfikës, kryezjarrfikës, nënkomisar zjarrfikës dhe komisar zjarrfikës.
Për gradat më të larta në hierarki do të aplikohet vetëm indeksimi prej 2.5 për qind, pa rritje shtesë.
Efekti financiar i këtij vendimi do të përballohet nga buxheti i institucioneve përkatëse qendrore dhe nga njësitë e vetëqeverisjes vendore, përmes transfertave të miratuara në Buxhetin e vitit 2026 dhe nga të ardhurat e tyre të veta.
Ndryshimet hyjnë në fuqi gjatë vitit 2026, duke prekur drejtpërdrejt strukturën e pagave për të gjithë punonjësit e MZSH-së në nivel kombëtar. /skyweb.al
