Që nga fillimi i këtij viti ka hyrë në fuqi metodologjia e re për llogaritjen e Indeksit të Çmimeve të Konsumit (IÇK). Ndryshimet kryesore lidhen me përditësimin e peshave në bazë të shpenzimeve mesatare të familjeve, sipas të dhënave të Anketës së Buxhetit të Familjeve 2024.
Gjithashtu, është përditësuar lista e mallrave dhe shërbimeve që përfshihen në shportë. Aktualisht, ajo përbëhet nga 411 produkte dhe shërbime, duke përfshirë 80 artikuj të rinj të shtuar, si edhe një listë të rishikuar të njësive tregtare ku mblidhen çmimet.
Në konferencën e parë vjetore të INSTAT për këtë vit u prezantua edhe drejtoresha e re e institucionit, Lantona Sado, e cila theksoi rëndësinë e cilësisë dhe besueshmërisë së të dhënave që prodhon Instituti i Statistikave.
Indeksi i Çmimeve të Konsumit është treguesi zyrtar i inflacionit në Shqipëri. Ai mat ndryshimet relative të çmimeve të mallrave dhe shërbimeve që familjet përdorin për konsum personal dhe llogaritet mbi bazën e strukturës së konsumit final të familjeve shqiptare. /skyweb.al
