Një debat i tensionuar u zhvillua në Kuvend mes deputetëve, në lidhje me protestën e opozitës të organizuar një ditë më parë dhe incidentet e raportuara gjatë saj. Përplasja kulmoi me akuza të drejtpërdrejta mes deputetit të Lëvizjes Bashkë, Redi Muçi, dhe ish-ministrit të Brendshëm, Ervin Hoxha.
Muçi deklaroi se klasa aktuale politike përballet me një nivel të lartë pakënaqësie publike, duke theksuar se politikanët duhet të jenë të ndërgjegjshëm për klimën e tensionuar shoqërore. Sipas tij, urrejtja e qytetarëve ndaj elitës politike është në rritje, referencë që shkaktoi reagime të menjëhershme në sallë.
Fill pas tij, Hoxha dënoi deklaratat e Muçit, duke i cilësuar ato si të papranueshme për një deputet. Ai theksoi se hedhja e molotovëve përbën vepër penale dhe se asnjë përfaqësues i popullit nuk mund të nxisë apo të relativizojë veprime kriminale.
Debati mori një tjetër dimension kur Muçi riktheu në vëmendje rastin e efektivit të Policisë Rrugore, Azbi Spahiu, i cili disa muaj më parë u hodh nga kati i shtatë i një pallati, pas pretendimeve për presion institucional.
Sipas Muçit, ish-ministri nuk kishte reaguar në kohë për të mbrojtur efektivin, i cili ishte përfshirë në arrestimin e Martin Mane, djalit të biznesmenit Samir Mane, pas një aksidenti rrugor në gjendje të dehur.
Martin Mane shkaktoi aksident pasi ishte i dehur në timon, sipas policisë
Ngjarja që ndezi debatin ndodhi në rrugën “Xhorxh Bush”, pranë Parlamentit, ku 28-vjeçari përplasi dy automjete të parkuara dhe u largua nga vendi i aksidentit. Ai u ndalua disa metra më tej nga Policia Rrugore. Sipas njoftimit zyrtar, i riu kundërshtoi kryerjen e testit të alkoolit, por testi rezultoi pozitiv.
Pak orë pas kësaj ngjarjeje, efektivi Azbi Spahiu, 57 vjeç, u raportua se u hodh nga kati i shtatë i pallati dhe u transportua në gjendje të rëndë në spitalin e Traumës.
Sipas saj, para ngjarjes, efektivi i kishte dërguar mesazhe të birit ku shprehej se po i shkatërrohej karriera.
Rasti ngriti pikëpyetje të mëdha mbi presionin institucional ndaj punonjësve të policisë dhe trajtimin e rasteve që përfshijnë persona me ndikim siç është biznesmeni Samir Mane.
Ndërkohë, djali i biznesmenit u transferua në spital pas arrestimit duke pretenduar gjendje jo të mirë shëndetësore dhe të nesërmen u lirua nga prokurori, i cili e konsideroi arrestimin të paligjshëm.
Institucionet përkatëse nuk dhanë sqarime të detajuara mbi procedurat e ndjekura, çka shtoi debatet publike. /skyweb.al
Gazeta e njohur greke: Si arriti në majë miliarderi i parë shqiptar, rrugëtimi i Samir Manes
