Dhoma e Biznesit e Diasporës ka publikuar statistika të reja që nxjerrin në pah peshën ekonomike dhe demografike të shqiptarëve që jetojnë jashtë vendit. Sipas të dhënave zyrtare për vitin 2025, diaspora e re shqiptare përbëhet nga rreth 2,256,346 individë, që përfaqësojnë afërsisht 49% të shtetasve shqiptarë në total.
Nga ky total, 1,177,529 janë meshkuj dhe 1,078,817 femra. Struktura sipas moshës tregon një komunitet kryesisht në moshë aktive pune: 18% janë 0–14 vjeç, 77% i përkasin grupmoshës 15–64 vjeç, ndërsa vetëm 5% janë mbi 65 vjeç. Sipas Dhomës, kjo përbërje përfaqëson një kapital njerëzor të ri, të kualifikuar dhe me potencial të lartë kontribues.
Remitancat mbeten një shtyllë e rëndësishme për ekonominë, me mbi 1 miliard euro të dërguara çdo vit. Megjithatë, theksohet se ndikimi real mund të jetë edhe më i madh nëse, përveç dërgesave financiare, integrohen në mënyrë më të strukturuar ekspertiza profesionale, investimet dhe rrjetet e bashkëpunimit të diasporës në strategjitë kombëtare të zhvillimit.
Sfida kryesore, sipas Dhomës së Biznesit, qëndron në forcimin e koordinimit institucional dhe krijimin e mekanizmave efikasë që lehtësojnë transferimin e njohurive, kapitalit dhe përvojës nga diaspora drejt ekonomisë vendase.
