Ambasada e Ambasada Britanike në Tiranë dhe Spitali Amerikan kanë rinovuar për tre vite të tjera marrëveshjen e bashkëpunimit që mbështet shkollimin e studentëve shqiptarë në Mbretërinë e Bashkuar përmes programit të bursave Chevening.
Marrëveshja u firmos nga ambasadori britanik Nicholas Abbott dhe CEO i Spitalit Amerikan, Klodian Allajbeu, duke konfirmuar vijimin e një partneriteti që synon zhvillimin profesional të të rinjve shqiptarë.
Në njoftimin zyrtar, Ambasada Britanike thekson se bashkëpunimi i deritanishëm ka kontribuar në mbështetjen e studentëve të talentuar për të ndjekur studimet në Mbretërinë e Bashkuar, duke krijuar një brez profesionistësh që tashmë po sjellin përvojën dhe njohuritë e fituara në Shqipëri. Sipas ambasadës, investimi në arsim mbetet një nga mënyrat më efektive për të forcuar kapacitetet njerëzore dhe lidhjet mes dy vendeve.
Rinovimi i marrëveshjes siguron vazhdimësinë e financimit dhe mbështetjes për aplikantët shqiptarë që synojnë të përfitojnë nga bursa Chevening në tre vitet e ardhshme, ndërsa palët shprehen optimiste për zgjerimin e mëtejshëm të bashkëpunimit në fusha të tjera të arsimit dhe zhvillimit profesional. /skyweb.al
