Vendimi u mor në një takim mes ministrit të Financave Petrit Malaj, drejtorit të Përgjithshëm të Tatimeve Ilir Binaj dhe drejtorit të Përgjithshëm të Doganave Besmir Beja, ku u dakordësua plani operacional i operacionit të përbashkët.
Sipas ministrit Malaj, kontrolli i shtuar në tregun e hidrokarbureve vjen edhe në kontekstin e zhvillimeve të fundit ndërkombëtare dhe konfliktit mes Iranit, SHBA-së dhe Izraelit, i cili ka ndikuar në çmimet globale të karburanteve.
Task Forca do të monitorojë çmimet dhe aktivitetin e kompanive që operojnë në tregun e hidrokarbureve, si në tregtinë me shumicë ashtu edhe në atë me pakicë, me qëllim parandalimin e çdo rritjeje të pajustifikuar të çmimeve për konsumatorët.
Kontrollet do të përfshijnë jo vetëm verifikimin e dokumentacionit tatimor dhe doganor, por edhe kontroll fizik të sasive të karburantit që tregtohen në depo dhe pika shitjeje në gjithë vendin.
Drejtori i Doganave Besmir Beja bëri të ditur se operacioni do të shtrihet në të gjithë territorin, duke u fokusuar te subjektet që identifikohen me risk.
Ndërsa drejtori i Tatimeve Ilir Binaj deklaroi se institucionet kanë nisur analizën e riskut dhe do të krijojnë grupe të përbashkëta kontrolli për të rritur formalizimin dhe për të garantuar funksionimin e rregullt të tregut të hidrokarbureve. /skyweb.al
