Ministria e Bujqësisë dhe Zhvillimit Rural ka sqaruar se mbështetja për fermerët përmes fondeve të Bashkimit Evropian pritet të rifillojë së shpejti, por aktualisht procesi është ende në rishqyrtim.
Në një reagim në rrjetet sociale, ministria bën të ditur se programi IPARD III nuk është hapur ende për aplikime, pasi ndodhet në fazën e rishikimit të procedurave, përfundimit të procesit të akreditimit dhe finalizimit të marrëveshjes së financimit me Komisionin Evropian.
Sipas sqarimit zyrtar, ky proces përfshin verifikimin dhe forcimin e sistemeve të menaxhimit, kontrollit dhe monitorimit financiar, në përputhje me standardet dhe kërkesat e Bashkimit Evropian. Qëllimi është garantimi i përdorimit transparent dhe efikas të fondeve.
Institucionet shqiptare përgjegjëse, në bashkëpunim të ngushtë me strukturat e Komisionit Evropian, po vijojnë punën teknike dhe administrative për të përmbyllur sa më shpejt procesin e akreditimit, në mënyrë që programi të hapet për aplikime menjëherë pas përfundimit të këtyre procedurave.
Programi IPARD III, që mbulon periudhën 2021–2027, konsiderohet një instrument i rëndësishëm financiar për mbështetjen e investimeve në bujqësi dhe zhvillimin rural. Ai gjithashtu përbën një hap të rëndësishëm në përgatitjen e Shqipërisë për menaxhimin e fondeve të Bashkimit Evropian në kuadër të procesit të integrimit.
Ministria e Bujqësisë thekson se do të informojë publikun dhe të gjitha subjektet e interesuara sapo të përfundojë procesi i akreditimit dhe programi të hapet zyrtarisht për aplikime.
