Turizmi në Greqi shënoi ngadalësim gjatë qershorit, pasi rritja e numrit të vizitorëve nuk u shoqërua me të njëjtin ritëm të të ardhurave.
Sipas të dhënave të Bankës së Greqisë, të ardhurat nga turizmi arritën në 3.48 miliardë euro, vetëm 1.2% më shumë krahasuar me qershorin e vitit 2025.
Ndërkohë, numri i turistëve të huaj u rrit me 6.9%, duke arritur në 4.62 milionë. Diferenca mes vizitorëve dhe të ardhurave lidhet me uljen e shpenzimeve mesatare për udhëtim.
Çdo turist shpenzoi mesatarisht 668.5 euro, ose 6.2% më pak se 712.5 eurot e regjistruara një vit më parë.
Të dhënat tregojnë se europianët vazhdojnë të udhëtojnë, por po shkurtojnë kohëzgjatjen e qëndrimit dhe po tregohen më të kujdesshëm me shpenzimet, për shkak të presioneve inflacioniste mbi të ardhurat.
Gjermania regjistroi më shumë vizitorë, por më pak të ardhura, ndërsa nga Britania e Madhe dhe Franca ranë si numri i turistëve, ashtu edhe arkëtimet.
Nga Shtetet e Bashkuara mbërritën më pak vizitorë, por rënia e të ardhurave ishte më e kufizuar, çka tregon se amerikanët që vizituan Greqinë shpenzuan më shumë. Përjashtimi pozitiv ishte Italia, me rritje të fortë si të mbërritjeve, ashtu edhe të të ardhurave.
Megjithatë, bilanci i gjashtëmujorit mbetet pozitiv. Gjatë periudhës janar–qershor 2026, Greqia priti 13.49 milionë turistë, 15.4% më shumë se një vit më parë, ndërsa të ardhurat u rritën me 14.8%, në 8.8 miliardë euro.
