Komisioni i Prokurimit Publik ka bllokuar tenderin për furnizimin me uniforma për shoqërinë “Illyrian Guard” Sh.A, një kontratë me vlerë rreth 1.6 milionë euro. Problemet e cilësisë së uniformave të Ilyrian Guard ishin bërë shpesh objekt i raportimeve mediatike.
Siç konstaton skyweb.al pas konsultimit të dokumentacionit të KPP, vendimi është marrë më 9 mars 2026, pasi KPP shqyrtoi një seri ankesash nga kompani pjesëmarrëse në garë dhe gjeti probleme në mënyrën se si ishte bërë vlerësimi i ofertave.
Procedura u kundërshtua fillimisht nga kompania “Arisa Konfeksion” SHPK, e cila depozitoi ankesë kundër mënyrës së zhvillimit të tenderit dhe vendimeve të marra gjatë procesit të vlerësimit të ofertave.
Komisioni i Prokurimit Publik vendosi të mos e pranojë këtë ankesë.
Në të njëjtën kohë ankesë paraqiti edhe bashkimi i operatorëve ekonomikë “Univers Promotions” SHPK dhe “Malbertex” SHPK, të cilët kundërshtuan skualifikimin e tyre nga gara dhe pretenduan se oferta e tyre ishte përjashtuar pa një argumentim të qartë.
Pas shqyrtimit të dokumentacionit, KPP arriti në përfundimin se autoriteti kontraktor nuk kishte sqaruar në mënyrë të qartë arsyet e skualifikimit të këtyre kompanive dhe nuk kishte evidentuar se cilat kushte të tenderit nuk ishin përmbushur nga oferta e tyre.
Sipas Komisionit, kjo ka krijuar një situatë të paqartë në procesin e vlerësimit të ofertave dhe nuk lejon verifikimin e saktë të vendimeve të marra nga Komisioni i Vlerësimit të Ofertave.
Për këtë arsye KPP vendosi të ndalojë vijimin e mëtejshëm të procedurës dhe të detyrojë autoritetin kontraktor të kryejë një rivlerësim të plotë të ofertave. /skyweb.al
